Munaı naryǵynda «oıynshylar» arasyndaǵy alaýyzdyq álemdik ahýaldy odan saıyn shıelenistirip otyr - U. Qarabalın
Búgin Astanadaǵy «KAZENERGY-2015» onynshy Eýrazııalyq forýmy aıasyndaǵy konferentsııada Energetıka vıtse-mınıstri Uzaqbaı Qarabalın osyndaı pikir bildirdi. Eske salaıyq, forým aıasyndaǵy munaı-gaz konferentsııasy «Eýrazııa óńirindegi energııa qaýipsizdigi: jańa yntymaqtastyq mehanızmi» taqyrybynda ótip jatyr.
Vıtse-mınıstrdiń aıtýynsha, qazirgi tańda álemde kómirsýtek naryǵyndaǵy derbes qyzmetter tezısinen jappaı qaıtý úderisi baıqalyp otyr. «Sonyń ishinde sońǵy eki jyldaǵy oryn alǵan oqıǵalar munaı jáne gaz salasynyń jahandyq ekonomıkanyń basqa da salalarymen ózara baılanysynyń kúsheıgenin kórsetip otyr. Buǵan geosaıası jáne spekýlıatıvtik faktorlar áseriniń de ósimi óz yqpalyn tıgizbeı qoımady. Sonymen qatar, búgingi tańda álemniń 20-ǵa tarta memleketindegi jaǵdaılar munaıdyń álemdik naryqtaǵy baǵasyna qatty baılaýly. Osyǵan baılanysty, jahandyq qarjylyq-ekonomıkalyq parametrlerdiń aǵymdaǵy salalyq trendtermen qosa ózgerýi munaı óndirýshi elder úshin erekshe «aýyr» bolýy yqtımal. Birinshi kezekte, kómirsýtek baǵalary damýshy jáne damyǵan elderdiń basym bóliginiń ekonomıkalyq ósimine aıtarlyqtaı áser etedi», - dedi U. Qarabalın.
Vıtse-mınıstrdiń sózine qaraǵanda, búgingi tańda jahandyq naryqtaǵy suranys pen usynys arasyndaǵy teńgerimdilik meılinshe ózekti bolyp tabylady. Bul rette Uzaqbaı Qarabalın sońǵy jyldary álemdik damý úderisinde jańa qubylystar paıda bolǵanyn alǵa tartady.
«Bul qubylys munaı óndirý kóleminiń ony tutynýdan aıtarlyqtaı ósip ketýine qatysty týyndady. Eger 2012 jyly mundaı dısparıtet eshqandaı shý týdyrmaıtyn rejımde ótken bolsa, 2014 jyly bul naryqtaǵy baǵanyń kúrt quldyraýyna ákep soqtyrdy. Árıne, munaı naryǵyndaǵy árbir qatysýshynyń óz múddesi barshylyq. Degenmen, alaýyzdyqtardyń týyndaýy, ortaq konsensýsty ilgeriletý tetiginiń kórinis tappaýy bul jaǵdaıdy onan saıyn shıelenistirip otyr», - dep túıindeıdi pikirin Uzaqbaı Qarabalın.