Munaı mınıstrligi benzınniń kóterme saýdadaǵy baǵasyn retteýge qatysty TMRA-nyń usynysyn qoldamaıdy
Búgin Májilistegi Úkimet saǵatynda depýtattardyń saýalyna jaýap bergen Munaı jáne gaz mınıstri Saýat Myńbaev osylaı málim etti.
Eske salsaq, buǵan deıin Tabıǵı monopolııalardy retteý agenttiginiń tóraǵasy depýtattar aldynda kóterme saýdadaǵy munaı baǵasyn retteý týraly másele kótergen edi. «Janar-jaǵarmaı baǵasyn kóterme saýdada retteýge kelsek, bunda birqatar máseleler bar. 2010 jylǵa deıingi zańnamada biz bólshek saýdadaǵy baǵany rettegenimiz joq. Árbir jer qoınaýyn paıdalanýshy úshin, eger ol dımınant bolsa Tabıǵı monopolııalardy retteý agenttigi kóterme baǵany belgilep, odan ári qaraı árkim óz qalaýymen júretin. Biz qazir 100 teńgeniń tóńireginde áńgime aıtyp júrmiz, al sol 2009 jyldary keıbir óńirlerdegi bólshek saýdadaǵy baǵa 150-ge deıin kóterilip ketken bolatyn. Sosyn kóterme saýdadaǵy baǵany retteýge kelgende, nege osynshama deldal kóp degen másele kóldeneńdegen bolatyn», - dep túsindirdi S. Myńbaev.
Onyń aıtýynsha, kóterme saýdadaǵy baǵany sońǵy tutynýshylar kóterip otyrǵan joq. Mınıstr muny bólshek saýdamen aınalysatyn taraptyń kóterip otyrǵanyn alǵa tartady. «Kóterme saýdany retteý máselesin de osylar aıtyp otyr. Munaı jáne gaz mınıstrligi bastapqyda buǵan qarsy emes edi, qazir de qarsy emes. Degenmen, bizdiń jalǵyz qarsy bolyp otyrǵan tusymyz bar, bul - eger ár óńirge qaraı jeke-jeke kóterme baǵany qoıatyn bolsaq, ıaǵnı Tabıǵı monopolııalardy retteý agenttigi usynǵan tásil júzege assa, onda kóterme saýda baǵasynyń ózi shashyrap, baǵynyqsyz bolyp ketedi. Bireýinde kóterme baǵa 50 teńge bolsa, ekinshisinde 80 teńge bolmaq. Endeshe biz taǵy da tyǵyryqqa tirelemiz. Sondyqtan da, bir sózben aıtqanda, biz kóterme saýdadaǵy baǵany retteýge qarsy emespiz, biraq buǵan aıyrmalardy aıqyndaıtyn tásilmen ǵana barý kerek», - dep túsindirdi S. Myńbaev.