Munaı mınıstri jyl sońyna jáne keler jyldyń birinshi toqsanyna deıin benzın baǵasy qubylmaıtynyn boljaıdy

ASTANA. 13 qarasha. QazAqparat - Aǵymdaǵy jyl sońyna deıin jáne kelesi jyldyń birinshi toqsanyna deıin elimizdegi munaı ónimderiniń baǵasy qalypta bolatyny boljanady. Bul týraly búgin Májilistiń jalpy otyrysynda «2013-2015 jyldarǵa arnalǵan respýblıkalyq bıýdjet týraly» QR zańyna ózgerister men tolyqtyrýlar engizý týraly» zań jobasyn talqylaý barysynda Munaı jáne gaz mınıstri Uzaqbaı Qarabalın málim etti.

Toqtala ketetin jaıt, talqylaý barysynda depýtat Shavhat Ótemisov saılaýshylar tarapynan benzın baǵasynyń kóterilýine alańdaýshylyq týyp otyrǵanyn aıtyp, halyq úshin janarmaı baǵasynyń turaqtylyǵy barynsha mańyzdy bolyp otyrǵanyn alǵa tartqan bolatyn. Óıtkeni, benzın baǵasyna barlyq baǵa qalyptastyrýshylar táýeldi.

Óz kezeginde mınıstr Uzaqbaı Qarabalın qazirgi ýaqytta elimizde benzındi ortasha jyldyq tutyný (AI-92-93) 2,6 mln tonnany quraıtynyn, onyń 30 paıyzy reseılik ımportpen jabylatynyn alǵa tartty. Onyń aıtýynsha, atalǵan markalardyń Reseıdegi bólshek saýdadaǵy baǵasy Qazaqstanǵa qaraǵanda lıtrine 30 teńgege nemese 20 paıyzǵa artyq.

«Janarmaıǵa baǵanyń kúrt artyp ketpeýin qamtamasyz etý maqsatynda memlekettik retteý tetikteri engizilgen. Toqtala ketetin jaıt, jyl boıyna munaıdyń álemdik baǵasy, onyń ishinde janarmaıdyń temirjolmen tasymaldaýyna baǵa qymbattaýyna qaramastan Qazaqstandaǵy benzın baǵasy turaqty boldy. AI-80 men dızeldik otyn baǵasy burynǵy qalypta ustaldy. Eger 2014 jylǵy baǵalarǵa kelsek, Tabıǵı monopolııalardy retteý agenttigi men Munaı jáne gaz mınıstrligi aı saıynǵy monıtorıng jumystaryn jalǵastyratyn bolady. Eger munaıǵa baǵa qubylatyn bolsa, onda ishki baǵa da bekitilgen erejelerge sáıkes túzetiledi. Sonymen qatar jyl sońyna deıin munaı ónimderine baǵanyń kóterilýi boljanbaıdy. Bundaı boljam aldaǵy jyldyń birinshi toqsanyna deıin saqtalady dep oılaımyz», - dedi mınıstr U. Qarabalın.