Munaı men munaı ónimderiniń zańsyz aınalymy salasynda anyqtalǵan qylmys 5 esege artty - Qarjy polıtsııasy
ASTANA. 17 qańtar. QazAqparat - Munaı men munaı ónimderiniń zańsyz aınalymy salasynda anyqtalǵan qylmys 5 esege artty. Bul týraly vedomstvo basshysy Rashıd Túsipbekovtiń málimetine silteme jasap QR Ekonomıkalyq qylmysqa jáne sybaılas jemqorlyqqa qarsy kúres agenttigi baspasóz qyzmetinen habarlady.
Onyń atap ótýinshe, «kóleńkeli» ekonomıka salasynda 6 myńǵa jýyq qylmys tirkelgen. Munaı men munaı ónimderiniń zańsyz aınalymy salasynda da anyqtalǵan qylmystardyń sany 5 esege artyp otyr. Al qolma-qol aqshaǵa aýdarýmen aınalysatyn kompanııalarǵa qarsy júrgiziletin jumysty jandandyrý qolma-qol aqshaǵa aýystyrylǵan qarajat kólemin 11 paıyzǵa tómendetýge múmkindik berdi. Sondaı-aq R.Túsipbekov aqsha qarajattaryn qolma-qol aqshaǵa aýdarýmen aınalysatyndarǵa qatysty qozǵalǵan qylmystyq isterdi aıaǵyna deıin jetkizýdi, sonymen qatar zań aıasynda jumys isteıtin bıznes sýbektileriniń quqyqtaryn negizsiz shekteýge jol bermeýdi talap etti. Vedomstvonyń aqparatyna qaraǵanda, shaǵyn jáne orta bızneske qolsuǵýshylyqqa jol bermeý boıynsha júıeli jumystyń nátıjesinde qarjy polıtsııasynyń bastamasymen júrgiziletin kásipkerlerdi tekserýlerdiń sany sońǵy 2 jylda 5 esege qysqartyldy. «Bul sharalar kóleńkeli aınalymnyń deńgeıin is júzinde tómendetip, bıýdjetke túsimderdiń kóbeıýine múmkindik berdi» - dedi agenttik basshysy.
