Munaı men gazdy tasymaldaý ári saqtaý salasynda kásibı standarttar jańartyldy
ASTANA.KAZINFORM — QR Energetıka mınıstrliginde «Munaı men gazdy tasymaldaý jáne saqtaý» baǵyty boıynsha Gaz ónerkásibi departamentiniń jumys tobynyń otyrysy ótti. Jıynda munaı gaz salasyndaǵy kásiptik standarttardy bekitý jáne jańartý máselesi qaraldy. Bul týraly vedomstvonyń baspasóz qyzmeti málim etti.
QR Energetıka mınıstrligi munaı men gazdy saqtaý jáne tasymaldaý baǵytyndaǵy kásibı standarttarǵa ózgerister engizdi. Tıisti buıryqqa mınıstr 2025 jylǵy 15 qazanda qol qoıdy. Jańartylǵan qujat aıasynda 5 kásibı standart bekitildi, olar 51 kásibı qyzmet kartasyn qamtıdy. Onyń ishinde úsheýi — gaz tasymaldaý, ekeýi — munaı tasymaldaý baǵyttaryna jatady.
Bekitilgen kásiptik standarttar tizimi:
1. «Tehnologııalyq jabdyqtardy paıdalaný jáne jóndeý»;
2. «Magıstraldyq qubyr jelilerin paıdalaný»;
3. «Kompressorlyq stantsııalardy paıdalaný jáne jóndeý»;
4. «Gaz taratý qubyrlaryn paıdalaný jáne jóndeý»;
5. «Gaz tasymaldaýdy basqarý».
Energetıka mınıstrliginiń málimetinshe, kásibı standart jobasy Ádilet mınıstrliginiń normatıvtik-quqyqtyq aktileriniń etalondyq baqylaý bankine resmı platformaǵa ornalastyrý úshin joldandy. Basqosýda QR Energetıka mınıstrliginiń Gaz ónerkásibi departamenti dırektorynyń orynbasary Erjan Qoshqarov 2025 jylǵa arnalǵan «Munaı men gazdy tasymaldaý jáne saqtaý» baǵytyndaǵy Salalyq keńestiń jumys jospary tolyq oryndalǵanyn atap ótti.
Sonymen qatar, Energetıka mınıstriniń buıryǵymen «Munaı men gazdy óńdeý jáne ótkizý» baǵyty boıynsha kásiptik standart bekitildi. Atalǵan standart «Munaı-gaz óńdeý jáne munaı-gaz hımııa ónerkásibinde óndiristi jáne ótkizýdi basqarýǵa» qatysty alty mamandyq kartasyn qamtıdy.
— Jyl basynan beri tórt jumys toby men tórt salalyq keńes otyrysy ótkizilip, kásibı standart jobalary jan-jaqty talqylandy. Sonymen qatar, salalyq biliktilik sheńberi jańartyldy. Salalyq uıymdar «Munaı jáne gazdy tasymaldaý jáne saqtaý» salasy boıynsha 2026 jylǵa arnalǵan 8 jańa mamandyq kartasyn qamtıtyn aldyn ala Jumys josparyn usyndy. Sonymen qatar, kompanııalar salalyq uıymdardaǵy jumysshy mamandyqtar men salaaralyq jáne salalyq mamandyqtar boıynsha jan-jaqty taldaý júrgizdi, — delingen habarlamada.
Aıta keteıik, jaqynda Májilis elimizdiń energetıkalyq qaýipsizdigin qamtamasyz etetin zań jobasyn maquldady.