Munaı men gaz salasyna ınvestıtsııa artty - Álibek Qýantyrov

ASTANA. QazAqparat – Munaı men gaz salasyna ınvestıtsııa ósip keledi. Bul týraly Ulttyq ekonomıka mınıstri Álibek Qýantyrov aıtty, dep habarlaıdy QazAqparat tilshisi.

Onyń aıtýynsha, álem elderinde ınvestıtsııalardyń salalyq qurylymy ózgerdi. Bul turǵyda munaı men gaz salasyna ınvestıtsııa ósti. 2020-2021 jyldary ınvestıtsııa 7 eseden astam qysqardy. 2022 jyly geosaıası jaǵdaılarǵa baılanysty memleketter osy baǵyttaǵy ınvestıtsııalardy ulǵaıta bastady. Onyń deńgeıi is júzinde 2019 jylǵy kórsetkishke deıin jetti.

«Kúrdeli syrtqy jaǵdaılarǵa qaramastan, 2022 jyly Qazaqstanda ekonomıkanyń naqty ósýi 3,2% boldy. 18 paıyz ósimdi eskere otyryp, elge 28 mlrd AQSh dollary somasynda tikeleı sheteldik ınvestıtsııa tartyldy. Bul kórsetkish 2012 jyldan beri rekordtyq deńgeıde», - dedi mınıstr.

Onyń sózine qaraǵanda, negizgi kapıtalǵa salynǵan ınvestıtsııalar naqty mánde 8%-ǵa ósti. Syrtqy saýda aınalymy 32 paıyzǵa ósip, 134 mlrd dollar boldy.

«Jumys istep turǵan shaǵyn jáne orta kásipkerlik sýbektileriniń sany 27%-ǵa ósip, 1,8 mln-nan asty. Osy salada jumyspen qamtylǵandardyń jalpy sany 13%-ǵa artyp, 3,9 mln adamǵa jetti. Nátıjesinde, ekonomıkadaǵy shaǵyn jáne orta bıznestiń úlesi 33,5%-dan 36%-ǵa deıin ósti», - dedi mınıstr.

Budan buryn habarlanǵandaı, Qazaqstanda sheteldik ınvestıtsııanyń basym bóligi shıkizat sektoryna baǵyttalyp jatyr.