Elmizde munaı men gaz óndirý kólemi artyp, kómir qazý kólemi azaıǵan

Ulttyq ekonomıka mınıstri Álibek Qýantyrov Úkimet otyrysynda munaı men gaz óndirý kólemi artqanyn málim etti, dep habarlaıdy Kazinform agenttigi .

«Óńdeý ónerkásibinde oń ósý saqtalyp otyr. Óndiris kólemi 3,2% ósti. Kórsetkishtiń ósýi 12 óńirde tirkeldi. Sonyń ishinde eń joǵarǵy ósýdi Qyzylorda, Qostanaı, Abaı oblystary jáne Almaty qalasy kórsetti. Óńdeý ónerkásibinde mashına jasaý óndirisiniń 27%, onyń ishinde avtomobıl jasaý salasy – 42%, elektr jabdyqtaryn jasaý – 31% ósti. Bul rette gaz óndirý – 9,7%, munaı óndirý – 9,3%, ózge de paıdaly qazbalardy óndirý – 14% artty», - dedi ol.

Onyń sózinshe, metall kenderin óndirý – 1,1%, taý-ken ónerkásibinde qyzmet kórsetý – 2,3%, kómir óndirý – 5,5% tómendedi. Oryndalǵan qurylys jumystarynyń kólemi 12,5% ulǵaıdy.

Qańtar-qazanda 13,3 mln sharshy metr turǵyn úı paıdalanýǵa berildi, bul ótken jyldyń sáıkes kezeńinen 14%-ke jýyq joǵary.

Aýyl sharýashylyǵynyń jalpy shyǵarylymy 8,6% tómendedi. Kórsetkishtiń tómendeýi dándi daqyldardy jınaý kóleminiń azaıýynan oryn aldy.

«Barlyq 7 ekonomıkalyq kórsetkish boıynsha oń ósý 5 óńirde – Abaı, Batys Qazaqstan, Jetisý jáne Qyzylorda oblystarynda, sondaı-aq Almaty qalasynda baıqaldy», - dedi Álibek Qýantyrov.