Munaı qunynyń quldyraýy Qazaqstanǵa keri áser etedi – sarapshy

ASTANA. KAZINFORM – AQSh prezıdenti Donald Tramp álem elderine saýda tarıfterin kótergen soń munaı baǵasy tómendep ketti. Óz kezeginde bul Qazaqstan ekonomıkasyna qalaı áser etpek? Munaı jáne gaz salasynyń sarapshysy Asqar Ismaılovtyń sózinshe, baǵanyń quldyraýynan el ekonomıkasy sózsiz zardap shegedi.

– Qysqa merzimdi perspektıvada bul eń aldymen memlekettik bıýdjet kirisiniń azaıýyna alyp keledi. Sebebi paıdaly qazbalardy óndirýge salynatyn salyq, eksporttyq baj salyǵy jáne munaı kompanııalarynan túsetin dıvıdendter kemıdi. Al valıýtalyq túsimniń qysqarýy teńgege devalvatsııalyq qysym túsirip, salanyń ınvestıtsııalyq belsendiligine de keri soǵýy múmkin, – deıdi maman.

Biraq bul jaǵdaı tek qaýip emes, strategııalyq betburys jasaýǵa da múmkindik. Sarapshy baǵanyń tómendeýi el ishinde óńdeý salasyn jedel damytýǵa túrtki bolýy kerek ekenin jetkizip, bıýdjet pen Ulttyq qor jaıyna da toqtaldy.

– Bıýdjet pen Ulttyq qor máselesine kelsek, baǵanyń qysqamerzimdi aýytqýy, árıne, kiriske áser etedi. Biraq Ulttyq qor dál osyndaı sátter úshin qurylǵan, ıaǵnı, tek jınaqtaýǵa emes, jaǵdaıdy rettep otyrý úshin de qajet. Mańyzdysy – qor «jyrtyǵymyzdy jamaýǵa» ǵana emes, qurylymdyq reformalardy qoldaý maqsatynda paıdalanylýǵa tıis.

Bul turǵyda biz tek «qalaı aman qalamyz» degen stsenarıımen shektelmeı, «qalaı paıda kóremiz» degen stsenarııge kóshýimiz kerek. Eger memleket pen bıznes reaktıvti emes, proaktıvti túrde áreket etse, baǵanyń tómendeýi jańa salalardy iske qosatyn bastamaǵa aınalýy múmkin, – dedi Asqar Ismaılov.

Munaı baǵasynyń quldyraýy ári qaraı jalǵasa bere me, álde bári ýaqytsha protsester me? Buǵan deıin Kazinform tilshisi sarapshylarmen birge «qara altyn» qunynyń keleshegine qatysty baılam jasap kórgen edi