Munaı kompanııasyndaǵy jumysshy ólimi: Komıssııa qorytyndysy shyqty
AQTÓBE. QazAqparat - Aqtóbede munaı kompanııasyndaǵy jumysshynyń ólimine qatysty qurylǵan komıssııa jumysyn qorytyndylady, dep habarlaıdy QazAqparat tilshisi.
Atalǵan komıssııa jumysynyń nátıjesine sáıkes, óndiristik jaraqat alyp, tiri qalǵan jumysshy tolyq em qabyldaǵansha jalaqysyn alyp otyrady. Al qaza bolǵan jumysshynyń otbasyna munaı kompanııasy men saqtandyrýshylar arasyndaǵy kelisimshart boıynsha aqsha tólenetin boldy.
Buǵan deıin habarlaǵanymyzdaı, Aqtóbedegi iri munaı kompanııasynda qaıǵyly jaǵdaı tirkelip, 54 jastaǵy er adam oqıǵa ornynda qaza boldy. Aqtóbe oblystyq eńbek ınspektsııasy jónindegi basqarmasy on kúnde jumysshylar qazasynyń sebebin anyqtaýy tıis bolatyn. Búgin ınspektorlar jumysshylardyń kúkirtti sýtekke ýlanǵanyn, munaı kompanııasy men saqtandyrýshylar arasyndaǵy kelisimshartqa baılanysty ótemaqy tólenetini belgili boldy.
«Eńbek ınspektorlary tekserý jumystaryn aıaqtady. Komıssııa jumysshy ólimi óndirispen baılanysty dep sheshim shyǵardy. Olar jumys istep júrgen kezde jaraqat alyp, biri qaza boldy. Eki adamǵa da akt toltyryldy. Aýrýhanada jatyp, em qabyldaǵan jumysshynyń jalaqysy tolyq tólenedi. Ol bir nemese eki aı emdelse de jumys ornynan aıyrylmaıdy. Al qaıtys bolǵan jigittiń otbasyna munaı kompanııasynyń jumysshylary aqsha aýdaryp, basshylyǵy kóńil aıtty. «SNPS-Aqtóbemunaıgaz» AQ men saqtandyrý kompanııasy arasynda kelisimshart bar. Adam jaraqat alsa, saqtandyrý kompanııasy aqshasyn tóleıdi. Biz úshin kelisimshart mańyzdy»,- dedi Aqtóbe oblystyq eńbek ınspektsııasy jónindegi basqarma basshysynyń orynbasary Baýyrjan Orazaev.
Aıta keteıik, ınspektsııa jumysshylardyń kúkirtti sýtekten ýlanǵanyn anyqtady. Zańnamaǵa sáıkes tekserý qorytyndysy ishki ister organdaryna jiberildi.
