Munaı kompanııalary Nıgerııa ekologııasyna 12 mıllıard dollar zııan keltirdi

ASTANA.QazAqparat - Nıgerııa munaı kompanııalarynan kómirsýtegin óndirý nátıjesinde eldegi qorshaǵan ortaǵa keltirilgen zııandy óteýdi talap etedi. Keltirilgen shyǵyn 12 mıllıard dollarǵa baǵalanyp otyr, dep habarlaıdy QazAqparat Euronews-ke silteme jasap.

Nıgerııa elde jumys isteıtin iri munaı kompanııalarynan ondaǵan jyldar boıy eldi lastaǵany úshin aqy tóleýdi talap etedi. Halyqaralyq sarapshylar komıssııasynyń tergeý nátıjeleri Nıger saǵasynyń (eldiń ońtústigindegi Nıger ózeniniń saǵasynda halyq kóp shoǵyrlanǵan aımaq) jarty ǵasyrlyq kómirsýtek óndirýden týyndaǵan naǵyz adamı jáne ekologııalyq apattyń sahnasyna aınalǵanyn kórsetedi. Bul aımaqtaǵy lastaný 1989 jylǵy Alıaska jaǵalaýyndaǵy «Ekson Valdes» tankerinen munaıdyń tógilýinen 50 ese joǵary.

1950 jyldary munaı tabylǵan jáne Shell men Eni ondaǵan jyldar boıy jumys istep kele jatqan Afrıkadaǵy Baıelsa shtatynda jaǵdaı óte aýyr.

«Men bul esep jaǵdaıdy ózgertedi dep úmittenemin, óıtkeni álemdegi kóptegen adamdar mundaı deńgeıdegi zulymdyqtardyń Nıger saǵasy men Baıelsa shtatynda jasalyp jatqanyn bilmeıdi. Bul esepte Shell, Chevron, Agip, elf jáne basqalardyń ondaǵan jyldar boıy jasyryp kelgeni týraly aqparat ashylady», - deıdi Baıelsa shtatyndaǵy basshylar keńesiniń tóraǵasy Reı Býbaraıe Dakolo.

Tergeý málimetteri boıynsha, Baıelsa shtatyndaǵy qorshaǵan ortaǵa keltirilgen zııandy joıý Nıgerııa bıligi munaı kompanııalary tóleýi kerek dep sanaıtyn kem degende 12 mıllıard dollardy quraıdy.