Munaı kompanııalary Qańtar oqıǵasynda qaza tapqandardyń otbasyna kómek berýden bas tartty – Abzal Quspan
«Óńirdegi keıbir quqyq qorǵaý organdarynyń basshylarynyń Prezıdenttiń Qańtar oqıǵasyn obektıvti túrde tergeý týraly tapsyrmasyn oryndamaý, tipti sabataj jasaý faktilerin áshkereledik. Ortalyq jáne óńirlik memlekettik organdar men quqyq qorǵaý organdarymen baılanys ornatyp, birlese qyzmet atqardyq. Olarǵa óz usynystarymyzdy udaıy berip otyrdyq. Qańtar oqıǵasy kezinde arandatýshylardyń jetegimen qylmystyq áreketterge barǵan azamattarymyzǵa raqymshylyq qoldaný týraly Prezıdentke usynys berdik. Osy zańnyń qabyldanýyna muryndyq boldyq. Qazirgi tańda osy zańnyń oryndalýyna da atsalysýdamyz. Raqymshylyq zańynyń arqasynda qylmysqa tartylǵan myńdaǵan adamnyń basym bóligi jaýapkershilikpen bosatyldy nemese jeńildikterge ıe bolady. Jalpy, naqty bir oqıǵaǵa baılanysty, bizdiń jaǵdaıda Qańtar oqıǵasyna qatysty birrettik raqymshylyq alǵash ret qoldanylǵanyn atap ótkim keledi», - dedi Abzal Quspan.
Advokattyń aıtýynsha, Qańtar oqıǵasynda 238 adam mert bolsa, onyń 148-i – Almaty qalasynyń turǵyndary. Osyǵan baılanysty komıssııa Almaty qalalyq prokýratýrasymen birge qylmystyq isterdiń ádil tergelýi, qaza tapqan azamattarǵa qatysty zańdy protsestik sheshim qabyldanýy, olardyń otbasylaryna materıaldyq-áleýmettik, tipti psıhologııalyq kómek uıymdastyrý baǵytynda jumys atqardy.
«Almaty qalasynda qaza tapqan azamattardyń týystaryna materıaldyq-áleýmettik kómek kórsetý máseleleri negizinen qalalyq prokýratýranyń uıymdastyrýymen memleketti organdar tarapynan ishinara sheshimin tapqanyn da basa aıtqym keledi. Atap aıtqanda, olardyń kredıtteri Qarjylyq monıtorıng agenttiginiń aralasýymen bankter tarapynan keshirilip, balalaryn balabaqshaǵa ornalastyrý, mektepke daıyndaý, qajetti medıtsınalyq kómek uıymdastyrý, tipti páteraqylaryn tóleý sııaqty turmystyq máseleler qamtyldy. Ókinishke oraı, komıssııa óz qyzmeti barysynda keıbir áttegen-aı degizetin jaǵdaılardyń da kýási boldy. Atap aıtqanda, alańda qaza taqan azamattarymyzdyń artynda qalǵan kóptegen jas otbasy páteraqy men azyq-túlik baǵasynyń kúrt qymbattaýy saldarynan qıyn materıaldyq jaǵdaıǵa tap bolǵan edi. Osyǵan baılanysty komıssııadan materıaldyq kómek surap kelýshiler sany da az bolǵan joq. Sol sebepti komıssııa elimizdiń munaı-gaz salasyndaǵy iri kompanııalaryna hat joldap, onda komıssııa arqyly nemese tikeleı muqtaj jandarǵa kómek berý týraly ótinishimizdi bildirgen bolatynbyz. Ókinishtisi sol, birde-bir kompanııa óz kelisimin bermedi. Tipti, «Qazaqstan halqyn qoldaý qory» da Qańtar oqıǵasy boıynsha tek memlekettik organdarmen jumys jasaıtyn yńǵaı tanytty. ıAǵnı, budan shyǵatyn qorytyndy, Prezıdenttiń «kásipkerlerdiń tómen áleýmettik jaýapkershiligi týraly» aıtqan synnyń qanshalyqty oryndy ekenin baıqaýǵa bolady», - dedi ol.
