Munaı kompanııalary daǵdarys aldynda tur – The Times

NUR-SULTAN. QazAqparat – «2014 jyly munaı baǵasy quldyraǵannan keıin kóptegen kompanııalar paıda tabý úshin jumysyn ońtaılandyrdy. Al bul joly qatelesýge bolmaıdy. Eger munaı tasymaldaýshy nemese alýshy kompanııalar shyǵynyn men ınvestıtsııasyn qysqartatyn bolsa, bolashaq rezervinde úlken jyryq paıda bolady», - dep jazady The Times basylymy.

Basylymnyń jazýynsha, ótken aptadaǵy Reseı men Saýd Arabııasynyń arasyndaǵy kelispeýshilik kesirinen OPEK+ alıansy qulap, munaı alýdaǵy shekteý týraly kelisim de oryndalmaıtyn boldy.

«Kópshiligi benzın men basqa da janarmaı baǵasynyń tómendegenine qýanýy múmkin. Degenmen, munaı kompanııalaryn quqyqtyq jumystar kútip tur.

«Mundaı kompanııalar qaryz ben kapıtal esebinen qarjylandyrylady. Munaı kompanııalarynyń qaryzy túptep kelgende jer qoınaýyndaǵy qorǵa baılanysty. Al munaı baǵasy quldyraǵan saıyn qordyń da azaıýynan bankter men basqa da nesıelendirý oryndary qaryzdy jabýǵa kepildik bolmaıtynyna alańdaı bastaıdy», - dep jazady avtor.

Onyń aıtýynsha, 2014 jyly munaı baǵasy quldyraǵan kezde kóptegen kompanııalar tólem qabilettiliginen aıyryldy. Bul joly da osy oqıǵa qaıtalanýy múmkin. Bul munaı óndirýshilerge ǵana emes, tasymaldaý kompanııalaryna da qatysty.

«Keı kompanııalar tómen baǵamen aktıv satyp alý múmkindikterine ıe bola alady. Al keıbireýi qaryzdarynan qutylý úshin aktıvterin satyp jiberýge májbúr bolady. Degenmen, munaı baǵasynyń turaqsyzdyǵynan kompanııalar qandaı da bir kelisim jasaýdy ázirge toqtata turatyny anyq», - dep jazylǵan maqalada.