Munaı qansha qymbattasa da Ulttyq qordan alatyn transfert ózgermeıdi – UEM

ASTANA. KAZINFORM – Ulttyq ekonomıka mınıstrligindegiler Taıaý Shyǵystaǵy ahýalǵa baılanysty munaı baǵasynyń qymbattaýy Ulttyq qordan bıýdjetke alynatyn transfert kólemine qalaı áser etetinin aıtty.

Vedomstvonyń Kazinform saýalyna bergen jaýabynda munaı baǵasy qalaı qubylsa da Ulttyq qordan 2026 jylǵa josparlanǵan transfert 2,77 trln teńge deńgeıinde qalatyny aıtylǵan.
Tipti Úkimettiń bul máseledegi ustanymy ózgere qalǵan kúnniń ózinde bıýdjet erejesi buǵan jol bermeıtini aıtylǵan.

- Respýblıkalyq bıýdjetke túsetin shıki munaıǵa eksporttyq kedendik bajdy qospaǵanda, munaı sektory uıymdarynan túsetin barlyq túsimder Ulttyq qorǵa esepke alynady. Ulttyq qordy qalyptastyrýdyń belgilengen tártibin eskere otyryp, kórsetilgen munaı kiristeri munaıdyń neǵurlym joǵary baǵasy kezinde qosymsha túsimderdi qosa alǵanda, Ulttyq qorǵa tolyq kólemde esepteledi. 

Osylaısha, munaı baǵasy bazalyq deńgeıden joǵary bolǵan jaǵdaıda túsetin qosymsha tabys respýblıkalyq bıýdjetke emes, Ulttyq qorǵa baǵyttalady, - dep jazylǵan mınıstrlik jaýabynda.

Jaýapta kepildendirilgen transfertti qaıta qaraý úshin respýblıkalyq bıýdjet týraly zańǵa ózgerister engizý kerektigi de aıtylǵan. Al qoldanystaǵy zańnamada munaı baǵasyna baılanysty transfert kólemin avtomatty túrde ózgertý tetigi qarastyrylmaǵan.

Qysqartyp aıtqanda, munaı naryǵyndaǵy qazirgi qolaıly jaǵdaı bıýdjet kiristerine birden áser etpeıdi jáne qosymsha túsimder negizinen Ulttyq qorda jınaqtalady.

Buǵan deıin «Ulttyq qor – balalarǵa» baǵdarlamasy boıynsha turǵyn úı jáne bilim alýǵa 46,8 mln-nan asa dollar baǵyttalǵanyn jazǵan edik.