«Munaı qaldyǵy emes»: Aqtaýda teńiz betindegi daqqa qatysty boljam aıtyldy

AQTAÝ. KAZINFORM – Aqtaýda teńiz jaǵalaýyndaǵy sý betinde baıqalǵan daqqa qatysty Mańǵystaý oblystyq ekologııa departamentiniń mamandary boljamyn jarııalady. 

Birneshe kún buryn Aqtaýda teńiz jaǵalaýy aýmaǵynan 14 shaqyrym jerde, ekinshisi Qyzylqum jaǵalaýynan 48 shaqyrym jerde daq belgileri baıqalǵany týraly aqparat jarııalanǵan edi. Departament mamandary teńizde birneshe kúdikti daq paıda bolǵany týraly habarlama túsken soń dereý jumysqa kiriskenin aıtty. 

«Atalǵan oqıǵa boıynsha elimizdiń UQK Shekara qyzmetiniń Mańǵystaý oblysy departamenti kómegimen Mańǵystaý oblysy ekologııa departamentiniń mamandary sholý jáne sýdan synama alý jumystaryn júrgizdi. Kórsetilgen orynnan radıýsy 5-6 shaqyrym aýmaqty qosymsha sholý jumystary jalǵasyp, eshqandaı kúndikti daq tabylmady. Synama nátıjesine sáıkes teńizdiń fondyq jaǵdaıynan asyp ketý tirkelgen joq. Bul Aqtaý portyna kelip-ketýshi «Qaraǵandy» jáne «Elegance» kemelerinen qalǵan tógindi bolýy múmkin. Ol shıki nemese aýyr munaı ónimderiniń qaldyǵy emes», - dedi ekologııa departamentiniń ókilderi.

Mamandardyń sózinshe, teńiz sýynan alynǵan synama qorytyndysy boıynsha zııandy zattekterdiń shamadan tys artýy tirkilmegen. Osyǵan deıin Mańǵystaýda Kaspıı teńiziniń jaǵalaýy aýmaǵyndaǵy sý betinen qara daqtar baıqalǵany týraly aqparat tarap, tıisti tekserý jumystary bastalatyny aıtylǵan bolatyn.