Munaı ındýstrııasy Atyraý ekonomıkasyn qalaı ártaraptandyryp jatyr
ASTANA. KAZINFORM — Prezıdent TRK bul suraqqa «Jańa Atyraý» derekti fılmi arqyly jaýap izdep kórdi. Fılm Jibek Joly arnasynda búgin saǵat 15:30–da kórsetiledi.
Atyraý oblysynyń geografııalyq orny bul óńirdi Kaspıı mańy aımaǵynyń tranzıttik habyna aınaldyrdy.
Osy jolda turaqty ári jemisti eńbek etip kele jatqan kompanııalardyń biri — TEXOL kásiporny 30 jyldan beri jumys istep tur. Kompanııanyń dırektorlar keńesiniń tóraǵasy Shota Abhazava eń alǵashqy kelisimshartty «Teńizshevroıl» kompanııasymen jasaǵandaryn eske alady. Keıin kásiporyn vagon quramyn ulǵaıtyp, suıytylǵan gaz tasymalyna mamandanady. Tyń baǵyt kompanııany 1939 jyly negizi qalanǵan vagon jóndeý deposyn quramyna qosýǵa ıtermeleıdi.
«Aq-Jaıyq 7» vagon jóndeý deposy jylyna 9 myń vagon jóndeýge qaýqarly. Mekeme kóbine munaı-gaz tasymaldaıtyn vagondardy jóndeýmen aınalysady. Oǵan qosa Atyraý oblysynda poıyz vagondarynyń barlyq túrine arnalǵan dóńgelek juptary qurastyrylady.
«Atyraý VDSh» JShS bas ınjeneri Ersultan Jamalash munda óndiris tolyqtaı avtomattandyrylǵan konveıerge negizdelgenin aıtady.
— Óndiristiń jalpy qýattylyǵy bizde kúnine 28 dóńgelek jubyn jasaýǵa eseptelgen. Bul kún saıyn 7 vagondy qaıtadan magıstraldyq jelige qosa alamyz degendi bildiredi, — deıdi JShS basshysy.
TEXOL kompanııasynyń ınjenerleri munaı rezervýaryn tazalaıtyn robot jasap shyǵarǵan. Ózderi ony 100 paıyz Qazaqstannyń ınnovatsııalyq ónimi retinde tanystyryp júr.
Munaı rezervýaryn tazalaý sheberi Ashat Dórbıev munaı rezervýarlaryn jóndegen kezde sarqyndy qaldyqty osy robottyń kómegimen tazalap júrgenderin aıtady.
Atyraýda ártúrli júkterdi tasymaldaýǵa arnalǵan vagon jasaıtyn zaýyt bar. Kásiporyn 2026 jylǵa qaraı jylyna 6-7 myń vagon jasap shyǵarýdy josparlap otyr.
«Teksol trans» JShS bas dırektory Borıs Zıganshın jumysqa qajet mamandardy syrttan izdemeý úshin jergilikti kásiptik-tehnıkalyq kolledjdermen áriptestik ornatyp jatqandaryn málim etti.
— Áýeli maman tapshylyǵyn jergilikti kolledjdermen áriptestik arqyly sheshemiz. Keıin óz mamandarymyzdy daıyndaıtyn jeke oqý ornyn ashpaqpyz, — deıdi ol.
Shota Abhazava kezinde óz kompanııasyn suıytylǵan gaz tasymaldaýǵa beıimdeý eń utymdy sheshim bolǵanyn aıtady.
— Qazir biz shynymen suıytylǵan gaz tasymalyndaǵy eń damyp kele jatqan kompanııamyz. Bul temirjol tasymalyndaǵy eń bir kúrdeli salanyń biri. Bul iske tehnıkalyq bilimmen qosa buljymas tártip, ozyq tehnologııa kerek. Kúshtiń bárin osyǵan salyp jatyrmyz. Óndiris protsesterin tehnologııa jańarǵan saıyn jetildirip otyramyz. Sonyń arqasynda únemi ońtaılandyrý bolyp turady. Osy turǵydan alǵanda saladaǵy standarttardy engizýge qaýqarly jetekshi kásiporyn boldyq dep aıta alamyn, — deıdi Shota Abhazava.
Atyraýdyń qoınaýyndaǵy batpan-batpan baılyqty sarqa ıgerip jatqan kompanııalar óńirdegi áleýmettik máselelerge den qoıýǵa mindettelip otyr. Óńir halqynyń bastamasymen qurylǵan «Kishkentaı el» áleýmettik aýyly múgedektigi bar adamdardy emdeý men janýarlarǵa qamqor bolýdyń jańa tásilderin jolǵa qoıǵan.
«Atyraý — malenkaıa strana» qoǵamdyq birlestiginiń tóraǵasy Erlan Kúmisqalıev ortalyqta jylqydan bastap, kishigirim qustarǵa deıingi túrli tirshilik ıeleri erekshe jaǵdaıdaǵy balalardy ońaltýǵa qoldanylatynyn jetkizdi.
— Eń bastysy ár janýarmen emdeýge arnaıy ǵylymı negizdeme jazylyp, emdeý baǵdarlamasyna resmı ruqsat alynǵan. Búginde álem elderinen Atyraýdaǵy «Kishkentaı el» aýylyna emdelýshiler aǵylyp kelip jatyr, — deıdi ol.
Oblys ákimi Serik Shápkenovtiń sózinshe, Atyraý óńirin el ekonomıkasynyń lokomotıvi, basty ındýstrııalyq aımaq deýge bolady.
— Elge salynyp jatqan ınvestıtsııanyń kóp bóligi osy Atyraý oblysyna baǵyttalyp jatyr. Keıingi kezde Qytaıdyń kóptegen kompanııasymen, kórshiles Tatarstan kompanııalarymen áriptestik qarqyndy damyp jatyr. Sol ınvestorlardy tarta otyryp, osy Atyraý ólkesinde arnaıy ındýstrııalyq aımaq quryp, sol aımaqta birlesken jobalardy iske asyryp jatyrmyz, — deıdi ol.
Buǵan deıin Atyraýdaǵy «Samal» qosalqy stantsııasy qarasha aıynda iske qosylatynyn jazǵan edik.