Munaı-gazdy óndirý kólemin baqylamaımyz - vıtse-mınıstr Dosmuxambetov
ASTANA. QazAqparat - Aldaǵy ýaqytta Qazaqstan munaı-gaz qory boıynsha esep berýdiń xalyqaralyq standarttaryna kóshedi. Sol kezde otandyq jáne sheteldik kompanııalar úshin esep berýdiń jańa úlgisi engiziledi. Atalǵan sharalar «Jer qoınaýy men jer qoınaýyn paıdalaný týraly» kodeks jobasyna qarastyrylǵan, dep xabarlaıdy QazAqparat tilshisi.
«Memlekettik baqylaýda tek qaýipsizdik kórsetkishteri ǵana qalady. Qazir de ondaı kórsetkishter bar. Jer qoınaýyn ıgerip jatqan kompanııa bolsa, ekonomıkalyq jaǵdaıǵa qaraı shıkizatty óndirý kólemin ózi anyqtaıdy. Munaı uńǵymalaryn kóp sala ma, az sala ma, ony ózi biledi. Biz óz tarapymyzdan munaı-gazdy óndirý kólemin baqylamaımyz. Biraq jer qoınaýyn tıimdi paıdalaný jaǵyn tekserip otyramyz. Shıkizatty qalaı bolsa solaı óndirýge, qorshaǵan ortany lastaýǵa jol bermeý kerek. Memlekettik organdar osy máselege basa nazar aýdaratyn bolady», - dedi energetıka vıtse-mınıstri Maxambet Dosmuxambetov búgin kodeks jobasyn talqylaýǵa arnalǵan jıynda.
Onyń aıtýynsha, geologııalyq qorlar boıynsha memlekettik saraptama qyzmeti qala beredi. Sebebi ondaı qyzmet jobalyq-smetalyq qujattardy daıarlaýǵa qajet.
«Qazaqstan jerinde iri shıkizat qorlary anyqtalsa, qosymsha ınvestıtsııalyq mindettemeler bolady. Ol da kodeks jobasynda kórsetilgen. Al 100 mln tonnadan az bolatyn qorlar boıynsha qosymsha mindettemeler bolmaıdy. Ondaıda ınvestor emin-erkin shıkizat óndirýdi bastaı alady», - dep atap kórsetti Dosmuxambetov.
Aıta keteıik, búgingi jıynda vıtse-mınıstr Maxambet Dosmuxambetov jańa kodeks jobasyn jan-jaqty tanystyrdy. Atalǵan qujat aıasynda jer qoınaýyn paıdalanýǵa ruqsat berý júıesin jeńildetý qarastyrylǵan.
