Munaı-gaz jobalarynda otandyq taýarlardy satyp alý boıynsha talaptar kúsheıtiledi
ASTANA. KAZINFORM — Qazaqstandyq óndirýshilerdi qoldaý maqsatynda satyp alý tetikteri jetildirilip, munaı-gaz jobalarynda elishilik qundylyq úlesine qoıylatyn talaptar kúsheıtiledi. Bul jóninde Úkimet otyrysynda Energetıka mınıstri Erlan Aqkenjenov málimdedi.
Onyń sózine júginsek, satyp alý qaǵıdalary bekitilgen. Erejege saı, eger Qazaqstanda taýardy óndiretin jalǵyz óndirýshi bolǵan jaǵdaıda odan tikeleı satyp alýǵa bolady.
– Al otandyq óndirýshilerdiń sany eki jáne odan kóp bolsa, konkýrs ótkizýdi kózdeıtin talaptar belgilengen. Taýarlar, jumystar jáne kórsetiletin qyzmetterdegi elishilik qundylyq úlesin arttyrý boıynsha júrgiziletin jumys sheńberinde munaı-gaz jobalarynda jer qoınaýyn paıdalanýǵa arnalǵan kelisimsharttarda satyp alynatyn taýarlardaǵy jergilikti qamtýdyń eń tómengi úlesi boıynsha mindettemelerdiń mindetti túrde bolýyn belgileıtin Jer qoınaýy týraly kodekske ózgerister engizildi. Jer qoınaýyn paıdalanýǵa arnalǵan kelisimsharttarǵa kem degende taýarlarda 30%, jumystar men qyzmetterde 80% kóleminde elishilik qundylyq boıynsha eń tómengi kórsetkishterdi engizý boıynsha jumys júrgizilip jatyr, – dep baıandady Energetıka mınıstri.
Ásirese, qazaqstandyq kompanııalardyń «Teńizshevroıl» (TShO), «Qarashyǵanaq Petroleým Opereıtıng» (QPO) jáne Soltústik Kaspıı jobasynyń operatory NCOC satyp alý úderisterine qatysýyn keńeıtýge erekshe nazar aýdarylyp otyr.
Máselen, Erlan Aqkenjenovtyń aıtýynsha, 2026 jylǵy qazan aıynda ótken salalyq forým men Ashyq esik kúnderiniń qorytyndysy boıynsha otandyq óndirýshilermen yntymaqtastyqty odan ári damytý jóninde 10 memorandýmǵa jáne 27 kelisimshartqa qol qoıyldy. Al 2025 jyly atalǵan úsh iri munaı-gaz operatorynyń taýarlar, jumystar men kórsetiletin qyzmetterdi satyp alý kólemi 2,8 trln teńge boldy. Bul aldyńǵy jylmen salystyrǵanda 4%-ǵa artyq.
– Otandyq ónimge suranysty arttyrýdyń taǵy bir tıimdi tetigi – uzaqmerzimdi jáne ofteık-kelisimsharttar. 2026 jyldyń basynan beri jer qoınaýyn paıdalanýshylar qazaqstandyq óndirýshilermen jalpy quny 79,7 mlrd teńge bolatyn 75 uzaqmerzimdi kelisimshart jasasty. Budan bólek, «QazMunaıGaz» ulttyq kompanııasy 668,9 mln teńgege 42 ofteık-kelisimshartqa qol qoıdy. Bul kelisimder otandyq kásiporyndarǵa óz ónimin ótkizýge kepildendirilgen suranysty alýǵa jáne óndiristik qýattardy keńeıtýge jol ashady, – dedi mınıstr.
Aıta keteıik, buǵan deıin Qazaqstan $1,2 mlrd-tyń energetıkalyq jobalary boıynsha kelisimderge qol qoıǵanyn jazǵanbyz.