Munaı, gaz jáne ózge de qazba óndirisinde teris kórsetkishter saqtalýda – QR UEM

NUR-SULTAN. QazAqparat – QR Ulttyq ekonomıka mınıstri Áset Erǵalıev taý-ken ónerkásibiniń negizgi nátıjelerin aıtyp berdi, dep habarlaıdy QazAqparat.

«Taý-ken ónerkásibinde ósýdiń oń aımaǵyna shyǵý baıqalýda. Jyl basynan beri sala boıynsha óndiris kólemi 0,1%-ǵa ǵana artty», - dedi Á. Erǵalıev Úkimettiń búgingi otyrysynda.

Mınıstr atap ótkendeı, salalar boıynsha óndiris metall kenderin óndirýde 4,1%-ǵa, taý-ken ónerkásibinde qyzmet kórsetýde – 2,1%-ǵa, kómir óndirýde – 0,2%-ǵa ósti.

«Shıki munaıdy, gazdy jáne ózge de paıdaly qazbalardy óndirý salalarynda óndiristiń áli de teris kórsetkishteri saqtalýda», - dedi Á. Erǵalıev.

Buǵan deıin Ulttyq ekonomıka mınıstri bıylǵy 10 aıdaǵy elimizdiń ekonomıkalyq damýyn baıandaǵan edi.