Munaı-gaz jáne kómir-hımııa salalaryndaǵy jobalarǵa túrik kompanııalary atsalysady
ASTANA. KAZINFORM — Túrkııa jańartylatyn energııa kózderi sektoryna da qyzyǵýshylyq tanytyp otyr. Bul jóninde QR Energetıka vıtse-mınıstri Sanjar Jarkeshov málimdedi.
— Elimiz óńdeý ekonomıkasyna kóship jatyr. Sondyqtan maqsatymyz — shıkizatty emes, óńdelgen ónimdi eksporttaý. Osy baǵytta munaı-gaz salasynda quny 15 mıllıard dollarlyq jańa jobalar júzege asyp jatyr. Olarǵa túrik kompanııalaryn da shaqyryp jatyrmyz, — dedi ol.
Sonymen birge, Jarkeshovtyń aıtýynsha, Qazaqstan úshin kómir-hımııa sektory da — mańyzdy baǵyt. Óıtkeni, elimizde 33,6 mln tonna qor bar.
— Bul salaǵa úmitimiz zor. Energetıka mınıstrligi kómir-hımııa baǵytyna úlken nazar aýdaryp otyr. Kómirden kóptegen ónim jasalady. Sondyqtan túrkııalyq Çalık Holding degen úlken kompanııa bizben seriktestikke qyzyǵýshylyq tanytyp otyr, — dedi ol.
Odan bólek, jańartylatyn energııa kózderi salasyna da Túrkııanyń qyzyǵýshylyǵy zor. Vıtse-mınıstrdiń sózinshe, jyl saıyn ótkiziletin aýktsıonǵa atalǵan memleket te shaqyrylǵan.
Aıta keteıik, buǵan deıin Túrkııa elimizdiń aýyl sharýashylyǵyna 400 mln dollar ınvestıtsııa quıǵanyn jazǵanbyz.
