Munaı-gaz salasynyń belgili mamany ómirden ozdy
ORAL. QazAqparat - 14 shilde kúni 76 jasqa qaraǵan shaǵynda munaı-gaz salasynyń bilgir mamany, táýelsiz Qazaqstannyń gaz ónerkásibin órkendetýge erekshe eńbek sińirgen isker uıymdastyrýshy, ekonomıka ǵylymynyń doktory Eset Raýatuly Ázerbaev ómirden ozdy, dep habarlaıdy «QazAqparat» tilshisi.
E.R.Ázerbaev 1942 jyldyń 14 qańtarynda Bashqurtstannyń Fedorovka aýdanyna qarasty Raevka aýylynda kolhozshynyń otbasynda jaryq dúnıege kóringen. Eset Raýatuly atamekennen alysta ómirge kelgenimen, Ázerbaevtar áýletiniń ataqonysy Batys Qazaqstan oblysyna qarasty Taıpaq óńiri bolyp tabylady.
1959 jyly orta mektepti támamdaǵan E.Ázerbaev 1959-1964 jyldary Ýfa munaı ınstıtýtynda oqyp, «Gaz qubyryn, gaz qoımalary men munaı bazalaryn jobalaý jáne paıdalaný» baǵyty boıynsha ınjener-mehanık mamandyǵyn alyp shyǵady. Eset Raýatuly eseli eńbegi arqasynda KSRO jáne Qazaqstan Respýblıkasyna keńinen tanyldy. Ol ár jyldary «Buqara - Oral», «Orta Azııa - Ortalyq», «Orynbor - Batys shekara» munaı-gaz qubyrlarynyń tartylýyna jáne iske qosylýyna tikeleı atsalysty. Gaz qoryn ıgerý, gaz qubyryn tartý jáne gaz tasymaldaý isin teorııalyq ári praktıkalyq turǵydan tereń meńgergen E.Ázerbaevtyń «Zakaspıısktransgaz», «Saratovtransgaz» jáne «ıÝgtransgaz» óndiristik birlestikterinde basshylyq qyzmetterde bolǵan jyldary onyń bilim-biligin jetildirip, tájirıbesin molaıtyp, kásibı sheberligin shyńdaı tústi. Mine, Eset Raýatulynyń osyndaı qadir-qasıetteri onyń 1987-1989 jyldary Lıvııa munaıgaz qubyry basqarmasynyń bas dırektory retinde eki jyldan asa abyroıly qyzmet isteýine jeteledi. Oral oblystyq atqarý komıteti tóraǵasynyń orynbasary, QazKSR Mınıstrler kabınetine qarasty «Qazaqgazprom» memlekettik kontserni basqarmasynyń tóraǵasy laýazymdarynda da E. Ázerbaevtyń iskerlik jáne uıymdastyrýshylyq qarym-qabileti jarqyraı kórindi. Al elimiz táýelsizdikke ıe bolǵannan keıin «Qazaqgaz» memlekettik holdıng kompanııasynyń prezıdenti retinde ol Qarashyǵanaq munaıgazkondensaty ken ornyn ıgerý, osy maqsatta shetelderden ınvestıtsııa tartý jáne elimizdiń ózge óńirleri men Batys Qazaqstan oblysynyń aýdan-aýyldaryn gazdandyrý syqyldy irgeli is, aýqymdy sharýaǵa eren eńbek sińirip, ólsheýsiz úles qosty.
KSRO men Qazaqstan Respýblıkasynyń munaıgaz salasyn órkendetýge sińirgen eńbegi úshin E. Ázerbaev Eńbek Qyzyl Tý, «Qurmet», «KSRO gaz óndirisi mınıstrliginiń ozaty», «Eren eńbegi úshin» sekildi orden-medaldarmen marapattaldy. Al onyń munaı men gaz syqyldy jer asty baılyǵyn ekologııalyq turǵydan qaýipsiz, ekonomıkalyq jaǵynan tıimdi ıgerýdi arqaý etken ǵylymı-kópshilik, ǵylymı-tehnıkalyq mazmundaǵy kóptegen maqala-materıaldary otandyq jáne halyqaralyq mamandandyrylǵan jýrnaldar men jınaqtarda jaryq kórdi.
