Munaı-gaz salasynda jergilikti qamtýdy oryndamaǵan kompanııalarǵa 128 mln. teńge aıyppul salyndy

ASTANA. QazAqparat - Munaı-gaz salasynda jergilikti qamtý baǵytyndaǵy mindettemelerdi oryndamaǵan kompanııalarǵa 128 mln. teńge aıyppul salyndy. Búgin «Nur Otan» partııasynyń Májilistegi fraktsııasy janyndaǵy Ekonomıkalyq saıasat keńesiniń otyrysynda Energetıka mınıstri Vladımır Shkolnık osylaı málim etti. Eske salaıyq, keńeste «Nur Otan» partııasy Saılaýaldy tuǵyrnamasynyń «Innovatsııalyq ekonomıka» baǵyty boıynsha máseleler talqylanǵan edi.

Mınıstrdiń aıtýynsha, sońǵy úsh jylda jer qoınaýyn paıdalanýshy kompanııalar arasynda qazaqstandyq úlesti arttyrý trendi baıqalyp otyr. Máselen, munaı men gaz salasynda jumysty, taýarlar men qyzmetterdi satyp alýdyń jalpy mólsheri 80 paıyzǵa artqan, ıaǵnı 1,5 trln. teńgeden 2,7 trln. teńgege jetken.

«Oń ilgerileýshilikterdiń bolǵanyna qaramastan, qazaqstandyq úleske, jergilikti qamtýǵa qatysty sharttardy barlyq kompanııalar oryndap otyrǵan joq. Eger 2012 jyly bul kórsetkish oryndalýy 75 paıyz bolsa, 2013 jyly tómendep, 69 paıyzǵa tústi. 2013 jyldyń qorytyndysy boıynsha jergilikti qamtý baǵytyndaǵy mindettemelerdi oryndamaǵan kompanııalarǵa 128 mln. teńge aıyppul salyndy», - dedi V. Shkolnık.

Mınıstrdiń sózine qaraǵanda, satyp alýlardyń ashyqtyǵyn saqtaýǵa qatysty jer qoınaýyn paıdalanýshylardyń satyp alý dınamıkasy da tómendegen.