Munaı-gaz salasynda jarty jylda 3 240 jumys orny quryldy

NUR-SULTAN. QazAqparat – Bıylǵy jarty jylda munaı-gaz salasynda 3 240 jumys orny quryldy. Bul týraly QR Energetıka mınıstri Bolat Aqsholaqov aıtty, dep habarlaıdy QazAqparat tilshisi.

«Elimizdiń batys bóliginde munaı-gaz-hımııany damytý úshin qajetti kómirsýtek shıkizatynyń ken oryndary shoǵyrlanǵan. Máselen, Atyraý oblysynda bıyl qýaty jylyna 500 myń tonna bolatyn álemdegi iri polıpropılen óndirisiniń birin iske qosý josparlanyp otyr. Osy jyldyń 2-shi jartyjyldyǵynda ónimniń 1-shi partııasyn alý kózdelgen», - dedi mınıstr Ortalyq kommýnıkatsııalar qyzmetindegi baspasóz máslıhatynda.

Onyń dereginshe, 2024 jylǵa deıin Atyraý oblysynda Qashaǵan ken ornynan alynatyn shıkizat bazasynda qýaty 1 mlrd tekshe metr shıki gaz shyǵaratyn gaz óńdeý zaýytyn jáne Batys Qazaqstan oblysynda qýaty jylyna 130 myń tonna metanol óndirý zaýytyn salýdy aıaqtaý josparlanǵan. Budan basqa, qýaty jylyna 1,2 mln tonna polıetılen jáne jylyna 186 myń tonna býtadıen óndirý jobalary pysyqtaýdyń ártúrli satysynda tur.

«Osy jobalardy iske asyrý aıasynda tartylatyn ınvestıtsııa somasy shamamen 14 mlrd AQSh dollaryn quraıdy jáne 2025 jylǵa deıin 14 myńnan astam jumys orny qurylatyn bolady. Osy jyldyń 1-shi jartyjyldyǵynyń qorytyndysynda munaı-gaz salasynda 3 240 jumys orny quryldy. Jyl sońyna deıin qosymsha 689 jumys ornyn qurý josparlanǵan», - dedi Bolat Aqsholaqov.

Foto: ortcom.kz