Munaı-gaz salasy boıynsha mashına qurastyrýdy qalaı damytamyz: Astanada forým ótti
Atalǵan jıyn QR Indýstrııa jáne ınfraqurylymdyq damý mınıstrligi men QR Energetıka mınıstrliginiń, sondaı-aq iri munaı-gaz operatorlarynyń qoldaýymen uıymdastyryldy.
Іs-sharanyń ashylýyna Premer-Mınıstrdiń orynbasary Altaı Kólginov, Indýstrııa jáne ınfraqurylymdyq damý vıtse-mınıstri Iran Sharhan, Energetıka vıtse-mınıstri Ashat Hasenov jáne Qazaqstan mashına jasaýshylar odaǵynyń basqarma tóraǵasy Meıram Pishembaev qatysyp, forýmnyń sátti ótýine tilekterin jetkizdi.
I.Sherhan aıtqandaı, basym baǵyttaǵy taýarlar men óndiristi lokalızatsııalaý boıynsha jumysty odan ári nyǵaıtý úshin jergilikti kásiporyndardyń múmkindikterin baǵalap, tizimin jasaýdaǵy júrgizilip jatqan jumystyń mańyzdylyǵy zor.
«Otandyq ónerkásipti damytyp, shaǵyn jáne orta bıznesti qoldaý – halqymyzdyń ál-aýqatyn arttyrýdyń kilti. Importty almastyrýǵa qaýqarly otandyq óndirýshilerdi osy baǵyttaǵy jumysqa barynsha tartyp, jańa jobalardy qurý men iske asyrý máselesin pysyqtaý qajet. Qazir mınıstrlik otandyq óndirýshilerdiń halyqaralyq standarttarǵa sáıkestigin rastaý kezinde sertıfıkattaýǵa jumsalǵan shyǵyndardy óteý máselesin qarastyryp jatyr», dedi vıtse-mınıstr.
Forýmnyń barysynda munaı-gaz kompanııalarynyń basshylary, Qarashyǵanaq, Qashaǵan jáne Teńiz ken oryndarynyń qyzmeti týraly aıtyp berdi. Sonymen birge IMB Ortalyǵynyń bas dırektory M.Kárimov atqarylǵan jumystardyń nátıjeleri men aldaǵy josparlarǵa keńirek toqtaldy.
Bul rette qazir Munaı-gaz salasyndaǵy mashına jasaýdy damytý jónindegi halyqaralyq ortalyq iri munaı-gaz jobalary úshin tehnologııalardy transferttep, óndiristi lokalızatsııalaýǵa qolǵabys etip kele jatqanyn aıta ketken oryndy.
«Dástúrge aınalǵan forýmnyń jumysy IMB Ortalyǵynyń qyzmetindegi nátıjeler jáne aldaǵy josparlarmen múddeli taraptardy aqparattandyrýǵa baǵyttalǵan. Jıyn kezinde qatysýshylar kókeıkesti saýaldaryn joldap, ózara pikir almasty»,-delingen habarlamada.
