Munaı-gaz salasyndaǵy otandyq óndirýshilerdi qoldaý qalaısha kúsheıtilmek
ASTANA. KAZINFORM – Búgin elordadaǵy «QAZMUNAIGAZSERVIS-2026» konferentsııasynda Energetıka vıtse-mınıstri Erlan Aqbarov iri ken oryndaryndaǵy otandyq taýar óndirýshilerdiń úlesin keńeıtýge qatysty túsinik berdi.
Onyń aıtýynsha, iri munaı-gaz jobalarynda elishilik qundylyqty damytýdyń tıimdi júıesin qurýdy qamtamasyz etýdegi memlekettik saıasatqa erekshe mán berilgen. Osy baǵytta mınıstrlik iri jobalardaǵy operatorlarmen birlesip jergilikti qamtýdy damytýda jáne operatorlar júrgizetin satyp alýlarǵa qazaqstandyq óndirýshilerdi barynsha tartýdy qamtamasyz etýde eleýli jumys júrgizdi.
— Birlesken kúsh-jiger birqatar mańyzdy nátıjelerge qol jetkizildi. Birinshiden, Soltústik Kaspıı, Qarashyǵanaq jáne Teńiz jobalarynyń tenderlik rásimderine ózgerister engizildi. Jańa erejeler birqatar yntalandyrýshy tetikterdi, onyń ishinde biryńǵaı otandyq óndirýshiden satyp alý múmkindigin, sondaı-aq ınvestıtsııaǵa aıyrbastaý úshin uzaq merzimdi kelisimsharttar jasaýdy eskerdi, — dedi Erlan Aqbarov.
Sonymen qatar ol jergilikti qamtýdy damytý baǵdarlamalary bekitilgenin eske saldy. Onyń aıasynda taýarlardaǵy, jumystar men kórsetiletin qyzmetterdegi elishilik qundylyq úlesin jyl saıyn arttyrýdyń birqatar nysanaly ındıkatory, sondaı-aq otandyq taýar óndirýshilerdi yntalandyrýǵa jáne qoldaýǵa baǵyttalǵan satyp alýdy júzege asyrý protsesiniń quraldary men tetikteri qamtylǵan. Munymen qosa, operatorlar ótinim berýden bastap kelisimshart jasasýǵa deıingi barlyq kezeńniń ashyqtyǵyn qamtamasyz etetin E-procurement elektrondyq satyp alý júıesin iske qosty.
Aıta ketý kerek, qazirdiń ózinde qalyptasqan tájirıbemen mınıstrlik otandyq bıznestiń munaı-gaz salasyndaǵy eń iri ınvestıtsııalyq jobalardyń qajettilikteri týraly ashyqtyǵy men habardar bolýy úshin NKOK, KPO, TShO munaı-gaz jabdyǵynyń satyp alynatyn taýarlaryn kórsetý úshin forýmdar, semınarlar men V2V kezdesýler ótkizedi.
Vıtse-mınıstr basqa da jer qoınaýyn paıdalanýshylardyń satyp alýlaryndaǵy ishki eldik qundylyq úlesin arttyrý sharalary qolǵa alynǵanyn aıtty.
Osy rette 2025 jyly jer qoınaýyn paıdalanýǵa arnalǵan 75 kelisimshartqa ózgeris engizildi, sonyń aıasynda ishki eldik qundylyq úlesi taýarlarda 40%-ǵa deıin, al jumystar men qyzmetterde 80%-ǵa deıin ulǵaıtyldy. Kúrdeli jobalar boıynsha jańa kelisimsharttarda jergilikti ónim berýshilerdi damytý baǵdarlamalaryn ázirleý mindettemeleri qarastyrylǵan.
Qol jetkizilgen nátıjeler otandyq ınjınırıngti odan ári damytýǵa negiz bolatyny atap ótildi. Basymdyqtardyń qatarynda — ulttyq ınjenerlik quzyretterdi nyǵaıtý, ınjınırıngtik qyzmetterdi oqshaýlaý jáne iri munaı-gaz jobalaryn iske asyrýǵa qazaqstandyq kompanııalardyń qatysýyn keńeıtý bar.
Eske salsaq, byltyr shilde aıynda Energetıka mınıstrligi Teńiz, Qashaǵan jáne Qarashyǵanaq jobalarynyń operatorlaryna otandyq óndirýshilerdi tartýǵa baǵyttalǵan naqty strategııalyq mindetter júktedi.
Aıta keteıik, jaqynda Soltústik Kaspıı jobasynda E-procurement elektrondyq satyp alý júıesi engizilgeni málim boldy.
