Munaı-gaz salasynda eńbek qaýipsizdigi men áleýmettik áriptestik máseleleri qaraldy
ASTANA. KAZINFORM — Energetıka mınıstrliginde munaı-gaz salasyndaǵy áleýmettik áriptestik máseleleri talqylandy.
2026 jylǵy 30 maýsymda Astana qalasynda Energetıka vıtse-mınıstri Q.S. Tutqyshbaevtyń tóraǵalyǵymen, munaı-gaz salasynyń salalyq kásipodaqtarynyń, «KAZENERGY», «PETROMINING» qaýymdastyqtarynyń, sondaı-aq Munaı-gaz-hımııasy ónimderin óndirýshiler men tutynýshylar qaýymdastyǵynyń jáne munaı-gaz salasy jumys berýshileriniń qatysýymen munaı-gaz, munaı óńdeý jáne munaı-gaz-hımııasy salalaryndaǵy áleýmettik áriptestik jáne áleýmettik-eńbek qatynastaryn retteý jónindegi salalyq komıssııanyń kezekti otyrysy ótti.
— Otyrysta munaı-gaz, munaı óńdeý jáne munaı-gaz-hımııasy salalaryndaǵy áleýmettik-eńbek qatynastary salasyndaǵy memlekettik saıasatty qalyptastyrý men iske asyrýdyń negizgi máseleleri qaraldy. Sonymen qatar 2026 jylǵa arnalǵan Salalyq komıssııanyń quramyna ózgerister engizý týraly másele qaralyp, tıisti ózgerister engizildi, — delingen habarlamada.
Eńbek jáne halyqty áleýmettik qorǵaý mınıstrligi Memlekettik eńbek ınspektsııasy komıtetiniń Aqtóbe, Atyraý, Batys Qazaqstan, Qyzylorda jáne Mańǵystaý ókilderi oblystardyń ahýaly boıynsha, sondaı-aq Mańǵystaý oblysy ákimdiginiń ókilderi baıandama jasady. Aǵymdaǵy jyldyń alty aıynyń qorytyndysy boıynsha munaı-gaz salasynda eńbek daýlarynyń aldyn alý, qaýipsiz eńbek jaǵdaılaryn qamtamasyz etý jáne óndiristik jaraqattaný deńgeıin tómendetý baǵytynda qabyldanyp jatqan sharalar týraly aqparat berildi.
«QazMunaıGaz» UK» AQ-nyń jáne onyń Aqtaý qalasyndaǵy ókildiginiń áleýmettik áriptestikti nyǵaıtý, eńbek daýlarynyń aldyn alý, sondaı-aq qaýipsiz eńbek jaǵdaılaryn qamtamasyz etý jáne óndiristik jaraqattaný deńgeıin tómendetý baǵytynda júrgizip jatqan jumysyna erekshe nazar aýdaryldy.
Sondaı-aq, «QAZAQGAZ» UK» AQ kompanııanyń óndiristik nysandaryndaǵy qyzmetkerlerdiń áleýmettik-turmystyq jaǵdaılaryn jaqsartý boıynsha aǵymdaǵy kezeńde qabyldanyp jatqan sharalar jáne áleýmettik shıelenisti tómendetý men eńbek daýlarynyń aldyn alý baǵytynda júzege asyrylyp jatqan is-sharalar týraly baıandady.
Buǵan deıin Qazaqstan men Germanııa energetıka salasyndaǵy jańa jobalardy iske asyrýǵa keliskenin jazǵanbyz.
