Munaı-gaz salasynda 220 myń adam jumys istep jatyr — mınıstr
ASTANA. KAZINFORM — Elimizde munaı-gaz salasynda 1,3 myńnan astam kásiporyn qyzmet etip jatyr. Bul týraly Parlament Májilisindegi Úkimet saǵatynda munaı salasyn damytýdy talqylaý kezinde QR Energetıka mınıstri Almasadam Sátqalıev málim etti.
«Munaı-gaz salasy — turaqty ekonomıkalyq damýdyń negizgi draıverleriniń biri sanalady. Qazir salada 1300-den astam kásiporynda 220 myńǵa jýyq adam jumys istep jatyr. Jalpy ishki ónim qurylymynda munaı-gaz salasynyń úlesi shamamen 16% quraıdy jáne el bıýdjetine túsetin túsimderdiń 28% astamyn jáne ekonomıkaǵa ınvestıtsııanyń 15%-dan astamyn qamtamasyz etip otyr», — dedi A. Sátqalıev.
Onyń aıtýynsha, 2024 jylǵy 1 qarashadaǵy jaǵdaı boıynsha kómirsýtegi shıkizatyna qatysty 315 kelisimshart jaramdy. 2020 jyldan bastap jer qoınaýyn paıdalaný quqyǵyn berý rásimi tolyǵymen avtomattandyryldy jáne aýktsıon arqyly elektrondy túrde ótkiziledi. Bul ony barynsha ashyq jáne aıqyn etedi.
«Osy kezeńde 9 elektrondyq aýktsıon ótkizildi. Onda bıýdjetke shamamen 49,5 mlrd teńge somasyndaǵy jazylý bonýsyn tóleı otyryp, geologııalyq barlaýǵa 443 mln dollar somasynda jarııalanǵan ınvestıtsııalar arqyly 110 jer qoınaýy ýchaskesi ótkizildi. Kelesi aýktsıon ótkizý 9 aýmaq boıynsha 2024 jyldyń 27 qarashasyna josparlanǵan. Jer qoınaýyn paıdalanýshylardyń kelisimsharttyq mindettemelerin oryndamaı, uzaq ýaqyt ustaǵan jer qoınaýy ýchaskelerine aýdıt júrgizý jumystary jalǵasyp jatyr. 2022 jyldan beri mınıstrlik qaıtadan aýktsıonǵa shyǵarylatyn 52 shartty buzdy. 9 kelisimshart boıynsha 1,9 mlrd teńgege qaryz óteldi. 2022 jyly sharttyq mindettemelerdi buzǵany úshin jalpy somasy 12 mlrd teńgege 158 habarlama joldanyp, onyń 5,6 mlrd teńgege jýyǵy óteldi», — dedi mınıstr.
Kelisimsharttyq mindettemelerdi buzǵany úshin 2023 jyly jalpy somasy 14 mlrd teńgege 141 habarlama joldanyp, qazir onyń 2,4 mlrd teńgege jýyǵy óteldi.
Jaqynda «QazMunaıGaz» qazirgi 80 myń jumys orynyn 50 jyl boıy ustap tura alatynyn jazǵan edik.