Munaı-gaz salasyna arnalǵan eńbek normalary qaıta qaralady
ASTANA. KAZINFORM — Munaı-gaz salasynda eńbekti normalaýdyń jańa tásilderi Energetıka mınıstrliginde talqylandy. Bul týraly vedomstvonyń baspasóz qyzmeti málim etti.
Búgin munaı-gaz, munaı óńdeý jáne munaı-gaz hımııasy salalaryndaǵy uıymdarda eńbek jónindegi úlgilik normalar men normatıvterdi ázirleý, kelisý jáne qaıta qaraý máseleleri boıynsha Jumys tobynyń bıylǵy alǵashqy otyrysy ótti.
QR Energetıka vıtse-mınıstri Qaıyrhan Tutqyshbaevtyń tóraǵalyǵymen ótken keńeske QR Eńbek jáne halyqtyq áleýmettik qorǵaý mınıstrliginiń, salalyq qaýymdastyqtardyń («KAZENERGY», «PETROMINING», Munaı-gaz hımııasy ónimin óndirýshiler men tutynýshylar qaýymdastyǵy), iri munaı-gaz kompanııalary men kásipodaqtardyń ókilderi qatysty.
— Bul jumys QR Eńbek kodeksi sheńberinde júrgizilýde, oǵan sáıkes 2025 jylǵy 1 qańtardan bastap eńbektiń úlgilik normalaryn bekitý jáne aýystyrý ókilettikteri eńbek jónindegi ýákiletti organmen kelisim boıynsha tıisti qyzmet salalarynyń memlekettik organdaryna bekitilgen, — delingen habarlamada.
Energetıka mınıstriniń buıryǵymen qurylǵan Jumys tobynyń músheleri munaı men gazdy barlaý, óndirý, tasymaldaý, saqtaý jáne óńdeý sııaqty negizgi baǵyttar boıynsha ózara is-qımyl algorıtmderin qarastyrdy.
Kezdesý barysynda «QazMunaıGaz» AQ, «InterGaz Ortalyq Azııa» AQ, «Teńizshevroıl» JShS, KPO jáne NKOK sııaqty kompanııalardyń praktıkalyq tájirıbesine erekshe nazar aýdaryldy.
Otyrys qorytyndysy boıynsha taraptar elimizdiń energetıka sektorynda tıimdi ári qaýipsiz óndiristik protsesti qamtamasyz etý úshin normatıvtik bazany jetildirý boıynsha birlesken qyzmetti jalǵastyrýǵa ýaǵdalasty.
Eske sala keteıik, energetıka nysandaryndaǵy tehnologııalyq protsesterdi basqarý júıeleri jańartylatynyn jazdyq.