Munaı-gaz salasyn damytýdyń jol kartasy aıasynda 3,5 myń turaqty jumys orny ashylady
ASTANA. KAZINFORM – Elimizde munaı-gaz hımııasy ónerkásibin damytýdyń 2024 – 2030 jyldarǵa arnalǵan jol kartasyn ázirlendi. Jol kartasy týraly tolyǵyraq Energetıka mınıstri Erlan Aqkenjenov aıtyp berdi.
— Munaı-gaz hımııasy ónerkásibin damytý munaı-gaz sektoryn shıkizat modelinen qosylǵan quny joǵary ónim óndirýge qaıta baǵdarlaýdyń basym baǵyttarynyń biri. Munaı-gaz hımııasy salasyn damytýdy Memleket basshysy ishki naryq úshin de, eksporttaý úshin de keń perspektıvalar ashatyn strategııalyq basymdyq retinde birneshe ret atap ótti. Búginde elimiz Eýrazııa óńirindegi munaı men gazdy iri óndirýshilerdiń biri, biraq bul bizdiń sala qurylymy shıkizat bolyp qala beredi. Biz áli de upstream-ge, ıaǵnı barlaý men óndirýge baǵyttalǵanbyz, — dedi Erlan Aqkenjenov Úkimet otyrysynda.
Mınıstrdiń málimdeýinshe, aýqymdy resýrs pen ınfraqurylymǵa qaramastan, munaıdy óńdeý áleýeti — ásirese munaı-gaz hımııasynda ishinara ǵana iske asyryldy. Bul birqatar strategııalyq qıyndyqty týdyryp otyr.
— Salany damytý úshin byltyr qazanda munaı-gaz hımııasy ónerkásibin damytýdyń 2024 — 2030 jyldarǵa arnalǵan jol kartasyn ázirledi. Qujat 6 negizgi baǵytty jáne salany keshendi yntalandyrýǵa baǵyttalǵan 34 is-sharany qamtıdy. Olardyń ishinde jalpy quny shamamen $15 mlrd bolatyn 6 iri ınvestıtsııalyq jobany iske asyrý kózdelgen. Bul jobalardy iske asyrý shamamen 3,5 myń turaqty jumys ornyn jáne qurylys kezeńinde 16 myńnan astam ýaqytsha jumys ornyn qurýǵa múmkindik beredi, — deıdi vedomstvo basshysy.
Byltyr elimizde 2029 jylǵa deıin munaı hımııasy salasynda quny $14,3 mlrd bolatyn 5 iri joba iske asyrylatyny týraly habarlaǵan bolatynbyz.