Munaı-gaz salasy úshin 11 jańa kásip kartochkasy ázirlenedi
ASTANA. KAZINFORM — 2026 jylǵa arnalǵan kásibı standarttardy ázirleý jáne ózektendirý josparyna sáıkes 8 kásibı standartty jańartý, 11 jańa kartochka ázirleý jáne qoldanystaǵy 2 kásip kartochkasyn jańartý kózdelgen.
Energetıka mınıstrligi Ulttyq biliktilik júıesin damytý, salalyq biliktilik sheńberin ózektendirý jáne munaı-gaz salasyndaǵy kásibı standarttardy jetildirý máselelerine arnalǵan «Munaı men gazdy tasymaldaý jáne saqtaý» baǵyty boıynsha Jumys tobynyń otyrysyn ótkizdi.
Lázzat Ahmýrzınanyń tóraǵalyǵymen ótken munaı-gaz, munaı-hımııa jáne munaı óńdeý salalary boıynsha Salalyq kásibı biliktilik keńesiniń otyrysyna QR Energetıka mınıstrliginiń Gaz ónerkásibi departamentiniń dırektory Eltaı Álıev, sondaı-aq memlekettik organdardyń, salalyq kompanııalardyń, qaýymdastyqtardyń, joǵary oqý oryndarynyń, TjKB uıymdarynyń jáne sarapshylar qaýymdastyǵynyń ókilderi qatysty.
Kezdesý barysynda salalyq biliktilik sheńberin ózektendirý, kásibı standarttardy bilim berý júıesimen jáne eńbek naryǵynyń suranysymen úılestirý, sondaı-aq salaǵa qajetti kadrlardy daıarlaý máseleleri qaraldy.
«Eńbek resýrstaryn damytý ortalyǵy» AQ jasandy ıntellekt tehnologııalaryn paıdalana otyryp ázirlengen kásibı standarttar konstrýktory men Career Enbek tsıfrlyq platformasyn tanystyrdy.
Al taldamaly ortalyq jańartylǵan salalyq biliktilik sheńberin usyndy.
2026 jylǵa arnalǵan kásibı standarttardy ázirleý jáne ózektendirý josparyna sáıkes 8 kásibı standartty jańartý, 11 jańa kartochka ázirleý jáne qoldanystaǵy 2 kásip kartochkasyn jańartý kózdelgen. Barlyq kartochkanyń memlekettik jáne orys tilderinde ázirlenip, Career Enbek platformasyna ornalastyrylǵany atap ótildi.
Sonymen qatar NCOC N.V. kompanııasynyń josparǵa qosymsha 15 kásip kartochkasyn engizý jónindegi usynystary qaralyp, talqylandy.
Energetıka mınıstrligi salalyq biliktilik júıesin damytý Qazaqstannyń munaı-gaz salasy úshin básekege qabiletti mamandar daıarlaý sapasyn arttyrýǵa múmkindik beretinin atap ótti.
Aıta ketelik energetıka salasyndaǵy árbir altynshy qyzmetker jumys istegen alǵashqy jyly-aq ketip qalatyny týraly jazǵan edik.
