Munaı-gaz nysandaryndaǵy apattardyń negizgi sebepteri belgili boldy
ASTANA. KAZINFORM — Qazaqstandaǵy munaı-gaz nysandaryndaǵy apattarǵa kóbine jabdyqtar men qubyrlardaǵy aqaýlar, munaı men gazdyń aǵýy, sondaı-aq óndiristik baqylaýdaǵy kemshilikter sebep bolady.
Bul týraly QR TJM Ónerkásiptik qaýipsizdik komıtetiniń munaı-gaz jáne munaı óńdeý ónerkásibindegi memlekettik baqylaý jáne qadaǵalaý basqarmasynyń basshysy Ahan Telmanov aıtty.
Spıkerdiń aıtýynsha, munaı-gaz kesheni nysandarynda ónerkásiptik qaýipsizdikti qamtamasyz etý TJM qyzmetiniń basym baǵyttarynyń biri bolyp qala beredi.
Munaı-gaz salasy tehnologııalyq turǵydan eń kúrdeli salalardyń qataryna jatady. Bul salada qysymmen jumys isteıtin jabdyqtar, qubyrjoldar, rezervýarlar, burǵylaý jáne tehnologııalyq qondyrǵylar paıdalanylady, al óndiristik protsester janǵysh jáne jarylys qaýpi bar zattardy qoldanýmen baılanysty.
— 2024-2026 jyldardaǵy apattardy taldaý olardyń negizgi sebepteri kóbine qaıtalanatynyn kórsetti. Apattarǵa jabdyqtar men qubyrlardan munaı nemese gazdyń aǵyp ketýi, korrozııa men dánekerleý kezindegi aqaýlar, uńǵymalardy burǵylaý jáne jóndeý kezinde gaz, munaı men sýdyń syrtqa shyǵýy, jarylys pen órt, sondaı-aq jumysty uıymdastyrý men óndiristik baqylaýdaǵy kemshilikter sebep bolyp otyr, — dedi Ahan Telmanov.
Sondyqtan onyń aıtýynsha, mańyzdy máselelerdiń biri — jabdyqtardy der kezinde jańartý.
— 2026 jylǵy 1 qańtardan bastap qaýipti óndiristik nysandardy jańartý jáne tehnıkalyq qaıta jaraqtandyrý boıynsha josparlardy tıisti organmen kelisý tártibi engizildi. Kásiporyndar osy jospardaǵy jumystardy belgilengen merzimde oryndaýǵa mindetti, — dedi spıker.
Ahan Telmanov basty mindet apat bolǵannan keıin onyń sebebin anyqtaý emes, qaýip-qaterdi aldyn ala anyqtap, apatqa jetkizbeı joıý ekenin atap ótti.
Aıta keteıik, buǵan deıin munaı óńdeý qýaty 40 mln tonnaǵa deıin artatyny habarlandy.
