Munaı-gaz nysandarynda apatty aldyn ala anyqtaýǵa jasandy ıntellekt qoldanylýy múmkin
ASTANA. KAZINFORM — Qazaqstanda munaı-gaz nysandaryndaǵy qaýipti jaǵdaılardy aldyn ala anyqtaýda jasandy ıntellekt kómekshi qural retinde qoldanylýy múmkin.
Bul týraly QR TJM Ónerkásiptik qaýipsizdik komıtetiniń munaı-gaz jáne munaı óńdeý ónerkásibindegi memlekettik baqylaý jáne qadaǵalaý basqarmasynyń basshysy Ahan Telmanov aıtty.
Onyń aıtýynsha, munaı-gaz salasyndaǵy ónerkásiptik qaýipsizdikti kúsheıtýdiń perspektıvaly baǵyttarynyń biri — jabdyqtardyń jaǵdaıyn úzdiksiz baqylaýǵa múmkindik beretin tsıfrlyq tehnologııalardy engizý.
— Oǵan qysym, temperatýra jáne korrozııany onlaın rejıminde baqylaý, aǵyp ketýlerdi anyqtaý júıeleri, derekterdi taldaý jáne jabdyqtaǵy aqaýlardy aldyn ala anyqtaý jatady. Bul rette jasandy ıntellekt kómekshi qural retinde qarastyrylady. Ol mamandarǵa qaýipti jaǵdaılardy aldyn ala anyqtap, aqaýdyń oryn alýyna jol bermeýge kómektesedi, — dedi Ahan Telmanov.
Vedomstvo ókili mundaı tehnologııalardy olardyń tıimdiligi men qaýipsizdigi tehnıkalyq turǵydan dáleldengen jaǵdaıda ǵana engizý qajet ekenin eske saldy.
Sondaı-aq basqarma basshysy munaı-gaz salasyndaǵy basym baǵyttardyń qatarynda jabdyqtardy ýaqtyly jańartý, óndiristik baqylaýdyń naqty ári tıimdi jumys isteýin qamtamasyz etý jáne apattardyń birdeı sebepteriniń qaıtalanýyna jol bermeý keregin de tilge tıek etti.
— Basty mindet apat bolǵannan keıin onyń sebebin anyqtaý emes, qaýip-qaterdi aldyn ala anyqtap, apatqa jetkizbeı joıý, — dedi ol.
Aıta keteıik, buǵan deıin munaı-gaz nysandaryndaǵy apattarǵa ne sebep bolatyny habarlandy.
