Munaı-gaz kompanııasynda qaýipsizdik talaby 1 366 márte buzylǵan
Tótenshe jaǵdaılar mınıstrligine qarasty ónerkásiptik qaýipsizdik komıteti Atyraý oblysy boıynsha departamentiniń memlekettik ınspektorlary «Nort Kaspıan Opereıtıng Kompanı N.V.» fılıalynyń qaýipti óndiristik obektileri men qaýipti tehnıkalyq qurylǵylaryna tekserý júrgizgen.
Tekserý kezinde 682 obekti («Bolashaq» munaı men gazdy keshendi daıyndaý qondyrǵysy, «Batys Eskene» temirjol kesheni, «Samal» vahta kenti, hımııalyq zerthana, qubyr jelisi, gaz jabdyqtary jáne basqalary) qamtylǵan.
Kásiporynda ónerkásip qaýipsizdik salasyndaǵy zańnama talaptaryn buzýdyń 1 366 deregi anyqtaldy. Memlekettik ınspektorlar anyqtalǵan buzýshylyqtardy joıý jqóninde nusqama berdi.
QR Ákimshilik quqyqbuzýshylyq týraly kodeksiniń 298-babynyń 1-bóligimen, 306-babynyń 4-bóligimen ákimshilik aıyppul salyndy.
«Kompanııa nysandarynda mynadaı ónerkásiptik qaýipsizdik talaptarynyń negizgi buzýshylyqtary anyqtaldy.
- flanetsti qosylystardan bý; qubyrlardaǵy kúkirt; sorǵylar men shyǵyn ólshegishterdegi maı aǵýdy ýaqtyly joıý;
- qysymmen jumys isteıtin ydystardy tehnıkalyq kýálandyrýdy ýaqtyly júrgizbeý;
- teńiz qubyrlaryn tehnıkalyq kýálandyrý kestesine sáıkes kásipshilik jáne kásipshilik aralyq munaı-gaz qubyrlarynyń teńiz ýchaskesiniń defektoskopııasyn (qubyrishilik dıagnostıka) ýaqtyly júrgizbeý;
- obektilerdegi qaýipsiz jumysqa jaýapty qyzmetkerlerdiń daıarlyqtan jáne qaıta daıarlaýdan ýaqtyly ótpeýi jáne basqalar.
Adamnyń ómiri men densaýlyǵyna, qorshaǵan ortaǵa qaýip tóndiretin buzýshylyqtar boıynsha Atyraý oblysy boıynsha mamandandyrylǵan aýdanaralyq ekonomıkalyq sotqa qaýipti óndiristik obektilerdi jáne qaýipti tehnıkalyq qurylǵylardy (qysymmen jumys isteıtin ydystardy, uńǵymalar men araldar arasyndaǵy kásipshilik qubyrlardy) toqtata turý týraly talap aryzdy jiberý túrinde jedel den qoıý sharalary qabyldanǵan.
Tekserý qorytyndysymen kompanııa ókilderimen keńes ótkizilgen. Onda tekserý kezinde anyqtalǵan buzýshylyqtardy joıý merzimi talqylandy.
«NKOK N.V.» fılıaly 1 maýsym men 15 shilde aralyǵynda júrgizilip jatqan keshendi kúrdeli jóndeý josparyna sáıkes jerústi jáne teńiz keshenderiniń qaýipti óndiristik obektilerinde jumysty toqtata turý týraly sheshim qabyldady.
Kúrdeli jóndeý óndiristik qondyrǵylardy paıdalanýdan shyǵarý jáne keıinnen qysymdy túsirý, drenajdaý, úrleý jáne tazalaý maqsatynda júrgiziledi.
«Jóndeý kezinde tekserýde anyqtalǵan zańbuzýshylyqtardy joıý josparlanǵan. Qaýipti tehnıkalyq qurylǵylardy tehnıkalyq kýálandyrý boıynsha is-sharaǵa departament basshysy orynbasarynyń jetekshiligimmen 8 ınspektorlyq quram jumyldyrylady», -dep málim etti ónerkásip qaýipsizdigi komıtetiniń baspasóz qyzmeti.
Eske sala ketelik, budan buryn Qashaǵan ken ornyndaǵy óndiristik nysandar jumysy 45 kúnge toqtaǵanyn jazǵan edik.
