Munaı-gaz kásiporyndarynda óndiristik baqylaýǵa qoıylatyn talap kúsheıdi
ASTANA. KAZINFORM — Qazaqstanda munaı-gaz kásiporyndaryndaǵy óndiristik baqylaýǵa qoıylatyn talaptar kúsheıtildi. Bul týraly QR TJM Ónerkásiptik qaýipsizdik komıtetiniń munaı-gaz jáne munaı óńdeý ónerkásibindegi memlekettik baqylaý jáne qadaǵalaý basqarmasynyń basshysy Ahan Telmanov aıtty.
Onyń aıtýynsha, munaı-gaz nysandaryndaǵy apattyń aldyn alý eń aldymen kásiporynnyń óz ishindegi baqylaýǵa baılanysty.
— Memlekettik ınspektor ár nysandy kún saıyn teksere almaıdy. Sondyqtan qaýiptiń aldyn alatyn negizgi jumys kásiporynnyń ózinde júrgizilýi kerek. 2026 jylǵy 1 qańtardan bastap óndiristik baqylaýǵa jaýapty qyzmetkerler sanyna qatysty jańa talaptar kúshine endi. Bul qyzmet kásiporynnyń birinshi basshysyna tikeleı baǵynady, — dedi ol.
Sondyqtan da ol óndiristik baqylaý qaǵaz júzinde qalyp qoımaýy kerek ekenin erekshe atap ótti.
— Basshylyq qaýipti jaǵdaıdy der kezinde anyqtap, ony joıýdy talap etýge, qajet bolsa qaýipsizdik talaptaryna saı kelmeıtin jumysty toqtatýǵa tıis, — dedi Ahan Telmanov.
Sondaı-aq kásiporyndarǵa jumys isteıtin merdiger uıymdardyń qyzmetine de baqylaýdy kúsheıtý kózdelgen.
Budan bólek, bıyldan bastap qaýipti óndiristik nysandardaǵy eski jabdyqtardy jańartý men tehnıkalyq qaıta jaraqtandyrýǵa qatysty jańa tártip engizildi. Kásiporyndar josparlanǵan jumystardy ýaqytynda oryndaýǵa mindetti.
Aıta keteıik, buǵan deıin munaı-gaz nysandaryndaǵy apattarǵa ne sebep bolatyny habarlandy.
