Munaı-gaz kásiporyndary maman daıarlaýǵa ózderi múddeli bolýy kerek - D. Nazarbaeva
ASTANA. QazAqparat - Munaı-gaz kásiporyndary maman daıarlaýǵa ózderi múddeli bolýy kerek. Búgin Májiliste Áleýmettik-mádenı damý komıtetiniń keńeıtilgen otyrysynda «Kásipqor Holdıngi» kompanııasynyń qyzmetin talqylaý barysynda palata vıtse-spıkeri Darıǵa Nazarbaeva osylaı málim etti.
«Jer qoınaýyn paıdalanýshylar men munaı óndirýshi kompanııalar ózderiniń aınalymdaǵy qarajatynyń 1 paıyzyn maman daıarlaýǵa jumsaýlary kerek. Bul qarajattar, sonyń ishinde sheteldik kompanııalar qarajaty qaıda? Sizder nege osy jumysty úılestire almaı otyrsyzdar? Al bıýdjetten nege osy maqsatqa qarajat shyǵyndalyp jatyr?» - dedi vıtse-spıker D. Nazarbaeva «Kásipqor holdıngi» tóraıymy Eldana Sádýaqasovaǵa qarata aıtqan sózinde.
Sonymen qatar, Darıǵa Nazarbaeva «Kásipqor holdıngi» negizinen jeke kompanııalar úshin mamandar daıarlap jatqanyn tilge tıek etti. Onyń aıtýynsha, memleket qazynasynan 12,8 mln. dollar bólinip, bul qarajatqa jeke kompanııalar úshin mamandar daıarlanýda.
«Eger munaı-gaz sektoryna kelsek, Qazaqstanda tehnıkalyq jáne kásiptik oqý oryndarynda jyn saıyn 7,5 myń adam bitirip shyǵady, olardyń tek 2,5 myńy ǵana óz mamandyǵy boıynsha jumysqa ornalasyp jatyr. Soǵan qaramastan, nege osy salalarǵa mamandar memleket esebinen oqyp jatyr, nege mamandarǵa zárý kásiporyndar ózderi oqytpaıdy?» - dedi D. Nazarbaeva.
Óz kezeginde «Kásipqor holdıngi» AQ tóraıymy Eldana Sádýaqasova bilim berý baǵdarlamalary negizinen munaı-gaz kompanııalarymen maquldanǵanyn, sosyn onyń úsh baǵyty boıynsha 600 stýdent oqyp jatqanyn atap ótti. «Biz ázirshe óz isimizdi quryp jatyrmyz, ony ilgeri jyljytsaq, sosyn birtindep bizge munaıgaz kompanııalary da kele bastaıdy. Jospar boıynsha ótpeli kezeń bes jyl boıy jalǵasady, sosyn sheteldik áriptes kolledjderdiń oqytýshylaryna úsh jyl boıy jalaqy tólep kelemiz, al tórtinshi jyly óz betimizshe jumysqa kirisemiz. Qazir osy baǵytta Atyraýdaǵy «Kásipqor» kolledjinde 39 sheteldik oqytýshy kelisimshartpen jumys istep jatyr, keıin olardy ózimizdiń oqytýshylar almastyratyn bolady», - dedi Eldana Sádýaqasova.
