Munaı-gaz hımııasy salasyna uzaq merzimdi tujyrymdamany ázirleý kerek - senator
Ol Memleket basshysy óz sózinde elimizde osy salany damytý qajettigine qatysty máseleni birneshe ret kótergenin atap ótti.
Senator atalǵan salany damytýdyń naqty tetikteri aıqyndalatyn uzaq merzimdi kezeńge arnalǵan jeke strategııalyq qujat qabyldaýdy usyndy.
Depýtat kórshi Reseıde mundaı qujat 2014 jyly qabyldanǵanyn jáne bul munaı-gaz hımııasy salasyna oń áser etkenin atap ótti. Jalpy somasy 20 mlrd AQSh dollaryn quraıtyn 16 iri ınvestıtsııalyq joba iske asyryldy. Sondyqtan, osy oń tájirıbeni nazarǵa ala otyryp, Qazaqstannyń munaı-gaz hımııasy salasyn damytýdyń 2030 jylǵa deıingi tujyrymdamasyn ázirleý máselesin qaraý qajet.
«Tujyrymdamada munaı-gaz hımııasy jobalaryn qolaıly quny boıynsha shıkizatpen qamtamasyz etý jónindegi mindetterdi sheshý kózdelýi kerek. Bul máseleni sheshýdiń múmkin joldarynyń biri - gazdardy odan ári óńdeý nátıjesinde taýarlar óndirilgen jaǵdaıda aktsızdiń eki eselengen mólsherinde salyq shegerimin qoldaný bolyp sanalatyn keri aktsız mehanızmin engizý. Munaı-gaz hımııasy klasterin qurý kezinde qolda bar barlyq resýrstardy tıimdi paıdalaný, artyq, negizsiz kólik shyǵyndaryn boldyrmaý, ákimshilik shyǵyndardy azaıtý úshin negizgi óndiristerdi bir óńirde ornalastyrýdy qamtamasyz etý qajet», - dedi senator.
Depýtat sonymen qatar Úkimet basshysyna bul úshin qaıtarymdy negizde jeńildikti nesıeler bere otyryp, gaz bólý qondyrǵylarynyń qurylysyn yntalandyrýdy usyndy.
