Munaı-gaz hımııasyn damytý: 15 mlrd dollardyń 6 jobasy júzege asady

ASTANA. KAZINFORM – Munaı-gaz hımııa ónerkásibin damytý Qazaqstan ekonomıkasyn ártaraptandyrýdaǵy basty baǵyttardyń birine aınalyp keledi. Bul týraly Energetıka mınıstrligi Munaı-gaz hımııasy jáne tehnıkalyq retteý departamentiniń dırektory Temirlan Úrkimbaev aıtty, dep habarlaıdy Kazinform agenttiginiń tilshisi. 

— Biz bul rette munaı-gaz hımııa ónerkásibi týraly jańa zań ázirleý jumystaryn qatar júrgizip jatyrmyz. Tujyrymdamasy daıyn, qazir joba memlekettik organdarda kelisý satysynda. Bul zań 2026 jyly qabyldanady dep kútilýde, — dedi departament basshysy.

Onyń aıtýynsha, 2024 jyldyń qazan aıynda Úkimet 2024–2030 jyldarǵa arnalǵan munaı-gaz hımııa ónerkásibin damytý jónindegi Jol kartasyn bekitken. Qujat jalpy quny 15 mıllıard AQSh dollar bolatyn 6 iri jobany iske asyrýdy kózdeıdi. Nátıjesinde shamamen 20 myń jumys orny (ýaqytsha da, turaqty da) ashylady. 

Aıta keteıik, buǵan deıin «QazaqGaz» basshysy elimizde qansha gaz qory baryn atap ótti.