Munaı-gaz hımııasy salasyndaǵy mańyzdy jobalar qalaı júzege asyp jatyr
ATYRAÝ. KAZINFORM — Atyraýǵa jumys sapary aıasynda QR Energetıka vıtse-mınıstri Sanjar Jarkeshov munaı-gaz hımııasy kesheniniń birqatar mańyzdy nysandaryn aralady. Bul týraly Energetıka mınıstrligi málim etti.
Sapar barysynda vıtse-mınıstr jylyna 1,25 mln tonna polıetılen óndiretin zaýyttyń qurylysymen tanysty. Qazirgi ýaqytta pırolız qondyrǵysy alańynda qazyq qaǵý jáne irgetas quıý jumystary júrgizilýde. Qazan aıynyń sońyna deıin daıyn ónim shyǵaratyn negizgi ekenshi qondyrǵy — polımerleý qondyrǵysynyń qurylysyn bastaý josparlanǵan.
— Qurylys qarqyn alǵan kezeńde joba 15 000-nan astam adamdy jumyspen qamtıdy dep kútilýde, al paıdalanýǵa berilgennen keıin shamamen 800 turaqty jumys orny ashylady. Kásiporyndy tolyqtaı aıaqtaý jáne iske qosý 2029 jylǵa josparlanǵan. Zaýyttyń óndiristik baǵdarlamasyna sáıkes, 20-dan astam markadaǵy polıetılen shyǵarý qarastyrylǵan, onyń 40%-y — premıým sanatyndaǵy ónimder bolmaq, — dep jazylǵan vedomstvonyń habarlamasynda.
Sondaı-aq, Sanjar Jarkeshov 2022 jyly iske qosylǵan «KPI» JShS-niń polıpropılen óndirý zaýytynda boldy. Jyldyq qýaty 500 myń tonnany quraıtyn kásiporyn zamanaýı amerıkalyq tehnologııa negizinde jumys isteıdi. Zaýyt iske qosylǵan sátten bastap 2024 jylǵa deıin 456 myń tonna polıpropılen óndirilip, onyń 430 myń tonnasy eksportqa jóneltilgen.
2025 jyldyń qańtar-tamyz aılary aralyǵynda zaýytta 230 myń tonna polıpropılen óndirilip, onyń 200 myń tonnasy eksportqa jiberilgen. Negizgi naryqtar — Qytaı, Reseı, Túrkııa jáne Eýropa elderi.
Kásiporynda qap, oraý materıaldary, jıhaz, kilem buıymdary, bir rettik ydys-aıaq jáne turmystyq taýarlar jasaýǵa arnalǵan polıpropılen ıgeriledi.
Sonymen birge vıtse-mınıstr býtadıen jáne onyń týyndylaryn óndirý jobasynyń júzege asyrylý barysymen tanysty. Jobany 2028 jyly iske qosý josparlanǵan. Jobanyń jyldyq qýaty — 339 myń tonna ónim. Qurylys-montaj kezeńinde 2000-ǵa jýyq jumys orny ashylady, al kásiporyndy paıdalaný kezinde 750-ge deıin turaqty jumys orny qamtamasyz etiledidep kútilýde. Ónimniń negizgi naryqtary — Qazaqstan, Eýropa, TMD, Qytaı jáne Túrkııa bolmaq.
Qazirgi ýaqytta birinshi tehnologııalyq blokqa jáne ekinshi bloktyń keńeıtilgen bazalyq jobasyn ázirleýge merdigerdi tańdaý boıynsha konkýrs ótkizilip jatyr. Qurylys-montaj jumystary 2027 jyly bastalyp, zaýyt 2028 jyly iske qosylady dep josparlanǵan.
Sapar aıasynda «Intago» JShS-nyń polıefırlik geosıntetıkalyq materıaldar óndirisin kórdi. Óńirde teńdesi joq bul kásiporyn jylyna 15 mıllıon sharshy metr ónim shyǵarady. Zaýytta tolyq óndiris tsıkli iske asyrylyp, jol qurylysynda qoldanylatyn materıaldar óndiriledi. Bul otandyq ónimniń ishki naryqta úlesin arttyryp, ımportqa táýeldilikti azaıtýǵa múmkindik beredi.
Sonymen qatar, vıtse-mınıstr «Ulttyq ındýstrııalyq munaı-hımııa tehnoparki» arnaıy ekonomıkalyq aımaǵynyń jumysymen tanysyp, KMG PetroChem keńsesinde munaı-gazohımııa salasyndaǵy jobalar jóninde aqparat tyńdady. Sondaı-aq, «KUS» JShS alańyndaǵy AEA-nyń ınfraqurylymymen tanysty.
Atyraýda polıetılen shyǵaratyn alǵashqy zaýyttyń qurylysy byltyr qyrkúıek aıynda bastalǵan bolatyn.