Munaı-gaz hımııa salasynda irgeli jobalar júzege asyrylýda - Ashat Hasenov
ASTANA. KAZINFORM - Memleket basshysy Qasym-Jomart Toqaev halyqqa arnaǵan joldaýynda munaı-gaz-hımııa salasyn odan ári damytý baǵyttarynda birqatar naqty mindetter júktedi.
«Munaı-gaz-hımııa salasyn odan ári damytý – mańyzdy mindet. Biz polıpropılen jáne polıetılen shyǵaratyn iri óndiristik jobalardy júzege asyra bastadyq. Býtadıen, karbamıd, tereftal qyshqylyn óndirýge arnalǵan basqa da bolashaǵy zor jobalar qolǵa alynyp jatyr», - dedi Prezıdent joldaýynda.
Bul baǵytta jasalyp jatqan aýqymdy jumystar men irgeli jobalardyń júzege asýy týraly «QazMunaıGaz» ulttyq kompanııasy aktsıonerlik qoǵamynyń basqarma tóraǵasy Ashat Hasenov jýyrda «Habar» arnasynyń «Betpe-bet» baǵdarlamasynda jan-jaqty aıtyp bergen bolatyn, dep habarlaıdy Kazinform.
Ashat Hasenovtiń sózinshe, memleket munaı-gaz hımııasy salasynyń damýyna erekshe nazar aýdaryp otyr. Óıtkeni bul mindet elimizdiń shıkizat eksportyna táýeldiligin azaıtyp, ekonomıkany ártaraptandyrý josparyna saı keledi. «QazMunaıGaz» tárizdi energetıkalyq kompanııalar úshin bul keleshegi zor baǵyt deýge bolady. Investıtsııa turǵysynan da tartymdy. «QazMunaıGaz» qazirgi kezde óz munaı-gaz-hımııa keshenin qalyptastyrý úshin belsendi jumys atqaryp jatyr eken. Bul kompanııa úshin ǵana emes, elimiz úshin de jańa ósý núktesi deýge bolady.
Máselen, 2022 jyldyń kúzinde Kazakhstan Petrochemical Industries Inc. gaz-hımııa kesheni iske qosylǵan. (KPI) Teńiz propanynan polıpropılen óndirý qýaty – jylyna 500 myń tonna. Tipti bizdiń makroóńirde bul óte úlken óndiris bolyp sanalady.
«Asa zamanaýı, tolyq tsıfrlandyrylǵan jáne ekologııalyq taza kásiporyn iske qosylǵannan keıin, buǵan deıin 50 myń tonnaǵa jýyq polıpropılen ımporttaǵan respýblıkanyń ishki naryǵy birden jandandy. Qazir Qazaqstanǵa sheteldik polıpropılenniń ımporty kúrt tómendedi, bul rette otandyq KPI zaýyty ónimderiniń ishki naryqtaǵy úlesi 50%-ǵa jetti, ıaǵnı jylyna shamamen 25 myń tonna polıpropılen otandyq óndirýshilerge jetkiziledi», - dedi «QazMunaıGaz» UK AQ basqarma tóraǵasy suhbat barysynda.
Onyń aıtýynsha, zaýyt ónimderiniń negizgi bóligi óz kezeginde eksporttalady. Óıtkeni, ulttyq kompanııaǵa bıznesti ártaraptandyryp, shıkizat qana emes, daıyn ónim satý týraly tapsyrma berilgen. Osylaısha, polıpropılen gazdan 15-20 ese qymbat turady. Tıisinshe, ony neǵurlym kóp satsa, soǵurlym qazaq ekonomıkasyna qosymsha paıda túspek.
Sonymen qatar, Ashat Hasenov munaı-hımııa salasyndaǵy basqa da jobalarǵa toqtaldy.
«Bul - qomaqty kapıtaldy qajet etetin sala. Búgingi kúni bizdi qorshaǵan dúnıeniń barlyǵy derlik polıpropılennen jasalǵan: kilemderden qubyrlarǵa deıin»,-dedi ol.
«QazMunaıGaz» UK AQ basqarma tóraǵasy kópten kútken taǵy bir joba – polıetılen óndiretin keshenniń qurylysyna keńinen toqtaldy. Oǵan salynǵan ınvestıtsııa, onyń ishinde GSK (Teńizdegi gaz bólý kesheni) qurylysy shamamen $11 mlrd quraıdy. Jobanyń ІJÓ-ge qosatyn úlesi 1,2% quraıdy. Al qurylys kezeńinde 8 myń jumys orny jáne paıdalaný kezinde 800 jumys orny ashylady. Jańa keshenniń aýqymy óte úlken.
Jalpy, bul baǵyttaǵy keshender tehnıkalyq jaǵynan kúrdeli jobalar, biraq ekonomıkaǵa qosatyn úlesi orasan. Oǵan qosa mamandardy daıarlaý jáne materıaldyq-tehnıkalyq jabdyqtaýdy damytý máselesi de bar.
