Munaı-gaz-hımııa ónimderin óndirý 2 ese ulǵaıdy

ASTANA. KAZINFORM — Munaı-gaz-hımııa ónimderin óndirý 2 ese ulǵaıdy. Bul týraly Úkimet otyrysynda Energetıka mınıstri Almasadam Sátqalıev aıtty.

«Osy jyldyń 4 aıynyń qorytyndysynda munaı-gaz-hımııa ónimderin óndirý kólemi ótken jylmen salystyrǵanda 2 ese ósip, 213,1 myń tonna boldy. Salanyń barlyq ónimderi boıynsha ósim baıqalady. Sonymen qatar mınıstrlik jumys istep turǵan kásiporyndardyń júktemesin ulǵaıtý boıynsha birqatar shara qabyldap jatyr. Jyl sońyna deıin 628,3 myń tonna munaı-gaz-hımııa ónimi shyǵarylady, bul degenimiz — ótken jyldyń uqsas kezeńimen salystyrǵanda 75 paıyz ósim», — dedi ol. 

Mınıstr munaı-gaz-hımııa salasyn odan ári damytý eldiń ekonomıkalyq ósiminiń negizi sanalatyndyǵyn aıtty.

«Mınıstrlik osy baǵytta keshendi jumys júrgizip jatyr. Onyń ishinde 2029 jylǵa deıin shamamen 14,3 mlrd dollaryna 5 iri jobany iske asyrý josparlanyp otyr. Osy jobalardy iske asyrý ekonomıkanyń jyl saıynǵy ósimin 1,5 paıyzǵa jetkizip, 20 myńǵa jýyq jumys ornyn qurýǵa múmkindik beredi. Onyń ishinde qurylys kezeńinde — 17 myń jáne paıdalaný kezeńinde — 3 myń jumys orny. Osy jyldyń ózinde qýaty 340 myń tonnaǵa deıin býtadıendi jáne onyń týyndylaryn óndirý jónindegi jobanyń qurylysy bastalady. Sondaı-aq qýaty 1,2 mln tonna polıetılen jobasy boıynsha el tarıhyndaǵy eń iri jobalardyń biri boıynsha ınvestıtsııalyq sheshim qabyldanady», — dedi Almasadam Sátqalıev.