Munaı-gaz, hımııa ónimderin óndirý kólemi 4 ese ulǵaıdy

NUR-SULTAN. QazAqparat – Sońǵy 4 jylda munaı-gaz hımııa ónimder óndirisiniń kólemi tórt ese ulǵaıdy. Bul týraly búgin Úkimet otyrysynda QR Energetıka mınıstri Nurlan Noǵaev aıtty, dep habarlaıdy QazAqparat tilshisi.

«Qazirgi ýaqytta Qazaqstanda munaı-gaz sektoryn shıkizattyq baǵyttan qosylǵan quny joǵary ónim shyǵarýǵa, ıaǵnı joǵary bólinistegi munaı-gaz hımııa ónerkásibin damytýǵa qaıta baǵdarlaý jónindegi jumys júrgizilýde. Prezıdenttiń 2020 jylǵy 1 qyrkúıektegi Qazaqstan halqyna Joldaýynda batys óńirlerdi munaı-hımııa keshenderiniń qurylysyna ınvestıtsııalar tartý ortalyqtary retinde qalyptastyrý, sondaı-aq munaı-hımııa men joǵary bólinisti gaz óńdeýdi damytý mindetin qoıdy», - dedi óńdeý ónerkásibin damytý jaıynda baıandaǵan mınıstr.

Onyń atap ótýinshe, jańa kásiporyndardyń iske qosylýyna jáne hosh ıisti kómirsýtekter, maılar men polıpropılen óndiretin zaýyttardyń ónim shyǵarý kóleminiń artýyna baılanysty jyl saıyn munaı-gaz hımııa ónimderi óndirisiniń ulǵaıýy baıqalady. Máselen, 2016-2020 jyldary shyǵarylǵan ónim kólemi 4 ese ósip, 360 myń tonnany qurady.

«Búginde elimizde jalpy qýaty shamamen 870 myń tonnany quraıtyn maılaý materıaldaryn, polıpropılen, metıl-tret-býtıl efırin, benzol men paraksılol óndiretin 5 zaýyt jumys isteıdi», - dedi Nurlan Noǵaev.