«Munaı-gaz-hımııa ónerkásibin damytý» jol kartasy bekitiledi
ASTANA. KAZINFORM – «Munaı-gaz-hımııa ónerkásibi týraly» zań ázirleý máselesi pysyqtalyp jatyr. Bul týraly Úkimet otyrysynda Energetıka mınıstri Almasadam Sátqalıev aıtty.
«Munaı-gaz-hımııa salasy joǵary mýltıplıkatıvti áser beretini belgili. Polımerli shıkizat jańa óndiristerdi damytý úshin negiz bolady. Osyǵan baılanysty osy salany damytý boıynsha júıeli tásilder talap etiledi. Atalǵan mindetti sheshý úshin mınıstrlik osy jyldyń maýsym aıynda „Munaı-gaz-hımııa ónerkásibin damytýdyń 2024–2030 jyldarǵa arnalǵan Jol kartasyn“ bekitetin bolady. Onda shıkizatpen qamtamasyz etýden bastap túpkilikti ónim shyǵarýǵa deıingi is-sharalar qamtylady. Sonymen qatar munaı-gaz-hımııa salasyn yntalandyrý jáne qoldaý maqsatynda „Munaı-gaz-hımııa ónerkásibi týraly“ zań ázirleý máselesi pysyqtalyp jatyr», — dedi Almasadam Sátqalıev.
Mınıstrdiń dereginshe, osy jyldyń 4 aıynyń qorytyndysynda munaı óńdeý kólemi 5,9 mln tonnany nemese ótken jyldyń sáıkes kezeńimen salystyrǵanda 105,4 paıyzdy qurady. Munaı ónimderin óndirý 4,28 mln tonna nemese ótken jyldyń sáıkes kezeńimen salystyrǵanda 94 paıyz boldy.
