Munaı-gaz-hımııa ónerkásibi týraly zań jobasy ázirlenip jatyr
ASTANA. KAZINFORM – Munaı-gaz-hımııa ónerkásibi týraly jańa zań jobasynyń maqsaty – munaı-gaz hımııasy salasyn damytý úshin ashyq ári tıimdi quqyqtyq negiz qalyptastyrý. Tolyǵyraq Energetıka mınıstri Erlan Aqkenjenov aıtyp berdi.
— Energetıka mınıstrligi múddeli taraptarmen, onyń ishinde «QazMunaıGaz» ulttyq kompanııasy, «KazEnergy» qaýymdastyǵy, munaı-gaz-hımııa ónimderin óndirýshiler men tutynýshylar qaýymdastyǵymen, sondaı-aq memlekettik organdarmen birlesip «Munaı-gaz-hımııa ónerkásibi týraly» zań jobasyn ázirleý qolǵa alyndy, — dedi Erlan Aqkenjenov Úkimet otyrysynda.
Zań jobasynyń maqsaty — munaı-gaz hımııasy salasyn damytý úshin ashyq ári tıimdi quqyqtyq negiz qalyptastyrý. Zań jobasyn mynalardy kózdeıdi:
• kásiporyndardyń shıkizat bazasyna teń qol jetkizýin qamtamasyz etý;
• qajetti ınfraqurylymdy damytý;
• memlekettik qoldaý sharalaryn, onyń ishinde qarjylandyrý, sýbsıdııalaý jáne salyqtyq jeńildikterdi qoldaný.
— Búginde zań jobasynyń konsýltatıvtik qujaty zań jobalaý qyzmeti máseleleri jónindegi vedomstvoaralyq komıssııa múshelerine kelisýge joldandy. Atalǵan zań jobasynyń strategııalyq mańyzdylyǵyn jáne zań shyǵarý jumysynyń merzimin saqtaý qajettigin eskere otyryp, Ádilet mınıstrligine konsýltatıvtik qujattyń jobasyn komıssııanyń jaqyn arada ótetin otyrysyna shyǵarýdy jáne ony Úkimettiń 2025 jylǵa arnalǵan zań jobalaý jumystarynyń josparyna engizýdi tapsyrýdy suraımyn, — dep tolyqtyrdy mınıstr.
Buǵan deıin munaı-gaz salasyn damytýdyń jol kartasy aıasynda 3,5 myń turaqty jumys orny ashylatyny týraly jazǵan edik.
Eske salaıyq, byltyr elimizde 2029 jylǵa deıin munaı hımııasy salasynda quny $14,3 mlrd bolatyn 5 iri joba iske asyrylatyny aıtyldy.