Munaı boıynsha jasalǵan kelisim baǵany tek ýaqytsha turaqtandyrady - HVQ

ASTANA. QazAqparat - Halyqaralyq valıýta qorynyń (HVQ) ókilderi munaı eksporttaýshy elderdiń álemdik naryqqa shyǵarylatyn munaı eksportyn shekteý jónindegi kelisimi baǵany belgili bir ýaqyt aralyǵynda ǵana ustap turyp, slantsili gazdyń óndirilýine oraı jaǵdaı qaıta ózgeriske ushyraıtyndyǵyn aıtady. Mundaı pikirdi qordyń resmı ókili Djerrı Raıs bildirdi dep habarlaıdy TASS.

«Bizdiń oıymyzsha, munaı eksportyn shekteý tásili munaı óndirýshi elderge birshama ýaqytqa deıin paıdasyn tıgizýi múmkin. Óıtkeni Saýd Arabııasy men Reseıdiń mamyr aıynyń ortasynda kelisimdi uzartý jóninde jasaǵan kelisiminen keıin munaıǵa degen baǵa birden kóterilip ketti»,-dedi joǵary laýazymdy maman.

«Orta merzimdi perspektıvada AQSh-taǵy slantsili gazdy óndirýshiler OPEK tarapynan qysqartylǵan ónimniń ornyn jabady»,-de jalǵastardy Raıs.

HVQ ókiliniń sózinshe, qordyń munaı baǵasy boıynsha boljamdarynyń ózi álemdik ekonomıkanyń qazirgi jaǵdaıy men bolashaq perspektıvalaryna baılanysty saraptamalyq baıandamanyń jańartylýyna oraı qaıta qaralatyn bolady. Jańartylǵan jańa jarııalanym shildede taraıdy.

Aıta keteıik, ótken jyldyń sońynda OPEK pen munaı óndirýshi 11 táýelsiz memleket 2017 jyldyń 1-shi jartysynda munaı naryǵynan táýligine 1,8 mln barrel munaıdy qysqartý jóninde kelisimge keldi. 25 mamyr kúni Venada OPEK elderi men oǵan kirmeıtin memleketter birigip, kelisimdi aldaǵy 9 aıǵa uzartý jóninde kelisti.