Munaı bazalary men MÓZ esepteý qurylǵylaryn ornatý keıinge shegeriledi
Bul týraly Senattyń Ekonomıkalyq saıasat, ınnovatsııalyq damý jáne kásipkerlik komıtetiniń keńeıtilgen otyrysynda málim boldy. Eske salaıyq, komıtette «Qazaqstan Respýblıkasynyń keıbir zańnamalyq aktilerine munaı ónimderiniń jekelegen túrlerin óndirý men aınalymyn memlekettik retteý máseleleri boıynsha ózgerister men tolyqtyrýlar engizý týraly» zań jobasy talqylanǵan bolatyn.
Aıta keteıik, zań jobasy buǵan deıin birinshi oqylymda maquldanǵan bolatyn. Senator Mıhaıl Bortnıktiń aıtýynsha, ekinshi oqylymǵa ázirleý barysynda usynylǵan túzetýler munaı óńdeý zaýyttarynda jáne munaı bazalarynda esepteý jáne baqylaý qurylǵylaryn engizý merzimin aýystyrý kózdelip otyr. Qoldanystaǵy zańǵa sáıkes, bul qurylǵylardy engizý 2016 jyldyń qańtarynan dep kórsetilgen bolatyn. Osyǵan baılanysty, atalmysh merzim munaı bazalary úshin 2018 jyldyń 1 qańtaryna, al munaı óńdeý zaýyttary úshin 2017 jyldyń 1 qańtaryna belgilenip otyr.
Toqtala ketetin jaıt, buǵan deıin «Atameken» Ulttyq kásipkerler palatasy munaı bazalary men zaýyttarynda eseptegish baqylaý qurylǵylaryn ornatýdy keıinge shegerý týraly másele kótergen bolatyn. Bıznes-qaýymdastyqtyń pikirinshe, eseptegish baqylaý qurylǵylarynyń jańa júıesine kóshý birshama ýaqyt pen qarjylyq shyǵyndy qajet etedi. Zańnyń bul talaby munaı bazalary men janar-jaǵarmaı stansalarynyń óndiristik, qarjylyq jaǵdaıyna keri áser etetinin alǵa tartqan bolatyn.
Tutastaı alǵanda, zań jobasy Qazaqstannyń munaı ónimderiniń jekelegen túrlerin óndirý jáne olardyń aınalymy salasyndaǵy qoldanystaǵy zańnamany jetildirý men quqyq qoldaný praktıkasynda anyqtalǵan quqyqtyq olqylyqtardy joıýdy kózdeıdi. Budan bólek, munaı jetkizýshileriniń munaı óńdeý zaýyty aýmaǵynda aýmaǵynda rezervýarlardan vagon-tsısternalarǵa quıý arqyly munaı ónimderin ótkizýdi júzege asyrý quqyǵy bekitiledi. «Atalǵan shara Memleket basshysynyń bızneske qatysty ákimshilik kedergilerdi azaıtý jónindegi tapsyrmalaryn iske asyrýdy jáne shalǵaıdaǵy aýdandar men eldi mekenderdi munaı ónimderimen turaqty jabdyqtaýdy qamtamasyz etýge múmkindik beredi», - deıdi senator Mıhaıl Bortnık.
Zań jobasy aldaǵy ýaqytta ótetin palatanyń jalpy otyrysynda ekinshi oqylymǵa shyǵarylatyn bolady.
