Munaı barreliniń baǵasy 78 dollardan asty
ASTANA. Jeltoqsannyń 29-y. QazAqparat - Nıý-Iorkte aqpan aıynda jetkiziletin munaıdyń baǵasy jeltoqsan aıyndaǵy eń joǵary kórsetkishke deıin ósip, saýda barysynda 78,68 dollar/barrelge jetti,
dep habarlaıdy VVS telekompanııasy.
Sońǵy eki aptada munaı baǵasy 12 paıyzdan astamǵa ósip, 80 dollarǵa jaqyndady.
Taldaýshylardyń aıtýynsha, bul jaǵdaı AQSh-ta kúnniń sýytýy, munaıdyń rezervtik qorynyń azaıýy jáne amerıkan ekonomıkasynyń tirshilik belgisin bildire bastaýy sııaqty birneshe faktormen baılanysty.
AQSh úkimeti ótken aptada munaı rezerviniń 5 mıllıon barrelge azaıǵanyn habarlady jáne osy úrdis jalǵasa berse, munaıdyń baǵasy kóterile bastaıtynyn málim etti.
Munaı baǵasynyń qymbattaýyna sondaı-aq, Reseı men Ýkraınanyń arasyndaǵy energetıkalyq daý sebep bolyp otyr, deıdi sarapshylar. Bul jolǵy problema Ýkraına gaz tranzıti úshin usynyp otyrǵan tarıfke reseı tarabynyń rıza bolmaýymen baılanysty.
Qytaı ekonomıkasyndaǵy oń ózgerister de munaı baǵasyna áser etip otyr. 2009 jyldyń qańtar-qarasha aılarynda eldiń jalpy ishki ónimi kútilgen 9 paıyzdyń ornyna 9,6 paıyzǵa ósti. Dollardyń valıýta kárzeńkesine qatysty álsireýi de munaı baǵasyna áser etýde.
Munaıdyń iri eksporttaýshysy jáne OPEK-ke múshe Saýd Arabstany, 70-80 dollar/barrel baǵanyń óndirýshilerdi de, tutynýshylar men ınvestorlardy da qanaǵattandyratynyn buǵan deıin málim etken bolatyn.
