Munaı baǵasynyń mundaı jolmen kóterilgeni kerek emes - Bozymbaev Arabııadaǵy shabýyl týraly
«BUU qabyrǵasynda ótken pikirtalas óte qyzyq boldy. Onyń munaı salasynyń bolashaǵyna qandaı da bir deńgeıde yqpal etetini sózsiz. Ózderińiz de bilesizder, kóptegen álemdik qarjygerler biraz ýaqyttan keıin kómirsýtek shıkizatyna qatysty jobalardy qarjylandyrýdan bas tartatynyn aıtyp otyr. Keı elder taıaý onjyldyqta benzın nemese dızel otynyn tutynatyn avtomobılderden tolyqtaı bas tartamyz deıdi. Munyń barlyǵy da shyndyq, ol barynsha jedel oryn alýy múmkin», - dedi Qanat Bozymbaev.
Mınıstrdiń aıtýynsha, qazirgi ýaqytta munaıdyń bolashaǵy men onyń qoryna qatysty boljamdar barynsha kóp ári alýan túrli bolyp keledi. Boljamnyń kópshiligi munaı óndirisiniń álemdik kólemi taıaý ýaqytta óziniń eń joǵary shegine jetip, odan keıin tómendeı bastaıdy degenge saıady. Al bul álemdik ekonomıkaǵa qater tóndiredi. Al endi zertteýler munaı qory taýsylmaıdy, biraq óndirý qıyndaı túsetinin kórsetip otyr.
«Degenmen, oryn alyp jatqan trendterdi qaperge alýymyz qajet. Biz ony eskerýge jáne jańa trendterge saı damýǵa mindettimiz», - dedi ol.
Osy oraıda mınıstr munaıdy álemdik naryqqa qaýipsiz shyǵarý máselesi aldyńǵy orynda turǵanyna nazar aýdartty.
«Saýd Arabııasyndaǵy nysandarǵa shabýyl jasalǵannan keıin baǵa 10 paıyzǵa ósip ketti. Biz bul jóninde áriptesterimizben áńgimelesken edik. Munaı óndiretin elderdiń eshqaısysyna baǵanyń mundaı jolmen óskeni qajet emes. Biz munaı óndirýshi elmiz. Sondyqtan jaýapkershilikti anyq seziný úshin, álemdik baǵaǵa, boljamdy jetkizilimge kómek kórsetý úshin «OPEK+»-ke qosyldyq. Atalǵan shabýylǵa deıin bizde barlyǵy naqty júrip jatyr edi», - dedi Qanat Bozymbaev.
Esterińizge sala ketsek, 14 qyrkúıek kúni Saýd Arabııasyndaǵy Abkaık munaı óńdeý kásiporny men Hýraıs munaı ken ornynda eki márte bolǵan shabýyldan soń munaı baǵasy sharyqtap ketken edi.
