Munaı baǵasynyń quldyraýy Qazaqstanmen qatar Qyrǵyzstan jáne Ózbekstanǵa da keri áserin tıgizdi
Bul pikirdi «Astana» klýbynyń ekinshi otyrysy aıasynda BAQ ókilderine suhbat bergen AQSh-tyń Karnegı qory Reseı men Eýrazııany zerdeleý baǵdarlamasynyń aǵa ǵylymı qyzmetkeri Pol Stronskı bildirdi, dep habarlaıdy QazAqparat.
«Biz halyqaralyq qatynastardyń basty problemalaryn, olardyń Ortalyq Azııa óńirine, onyń ishinde naqty Qazaqstanǵa yqpalyn talqyladyq. Munan bólek, bolashaqtyń problemalaryn da qozǵadyq. Onyń ishinde ekonomıkalyq máseleler men terrorızm problemasy, bul problemalarǵa túrli memleketterdiń qarsy áreket etý múmkindikteri de sóz boldy. Men bul jerdegi ekonomıkalyq problemalardy jáne onyń qarapaıym adamǵa qalaı áser etetindigin jete bildim. Bul men úshin qyzyqty edi», - dedi sheteldik sarapshy.
Sonymen qatar ol Astana klýby syndy suhbat alańynyń mańyzdylyǵyn atap ótti.
«Amerıka, Eýropa, Qytaı, Ortalyq Azııanyń barlyq sarapshylary bas qosyp, jahandyq kún tártiptegi ózekti máselelerdi túrli kózqaras turǵysynan talqylaýy sırek kezdesetin jaıt. Men úshin olardyń pikirlerin tyńdaý paıdaly boldy. Munda Úndistan men Irannan da sarapshylar kelgen. Amerıkalyq retinde meni ırandyqtardyń saraptamalaryn tyńdaý barynsha qyzyqty. Búgingi kúni sarapshylardy alańdatatyn basty másele munaı baǵasynyń tómendigi men óńirdegi ekonomıkalyq jáne saıası turaqtylyq bolyp otyr. Bul munaıly memleket sanalatyn Qazaqstan úshin ǵana emes, sonymen birge qara altyny joq bolsa da ekonomıkalyq problemalary bar kórshiles Qyrǵyzstan men Ózbekstanǵa da mańyzdy», - dedi Stronskı.
Aıta keterligi, keshe Qazaqstan Prezıdenti Nursultan Nazarbaev klýb otyrysyna qatysyp, sóz sóılegen bolatyn. Al klýbtyń búgingi otyrysyna álemniń 50-den astam sarapshysy, saıası jáne qoǵam qaıratkerleri, 21 eldiń ǵalymdary, sonymen birge jetekshi qazaqstandyq sarapshylar qatysýda. Klýb otyrysyna qatysýshylar «Eýrazııa toǵysynda: Óńirlik problemalarǵa negizgi álemdik oıynshylardyń kózqarasy», «Eýrazııa resýrstary: «Altyn ǵasyrdyń» sońy ma?», «Eýrazııa adamdary: turaqsyzdyq kózi me álde baılyq kózi me?» syndy sessııalarda Eýrazııa óńirine qatysty ózekti máselelerdi jan-jaqty talqylaýda. Astana klýby QR Tuńǵysh Prezıdenti - Elbasy qorynyń jetekshi halyqaralyq ǵylymı ortalyqtar Qytaı qazirgi zamanǵy halyqaralyq qatynastar akademııasy, Germanııa syrtqy saıasat keńesi, Reseı halyqaralyq ister keńesi jáne Halyqaralyq beıbitshilik úshin Karnegı qorymen birlesip qurǵan halyqaralyq pikirtalas alańy sanalady. Astana klýbynyń birinshi otyrysy 2015 jylǵy qarashada álemniń 15 elinen kelgen 47 sarapshynyń qatysýymen ótken edi. Onyń barysynda Eýrazııa geoekonomıkasynyń negizgi aspektileri, ǵalamdyq jáne óńirlik oıynshylardyń múddeleri, ekonomıkalyq qaýip-qaterler men múmkindikter máseleleri talqylanǵan bolatyn.
