Munaı baǵasynyń budan keıin aıtarlyqtaı quldyraýy oryn almaıdy
ASTANA. QazAqparat - Munaı baǵasynyń qazirgiden artyq tómendeýi bolmaıdy. Bul týraly búgin Ortalyq kommýnıkatsııalar qyzmetindegi «Jahandyq synaq ýaqyty: jańa syn-qaterler» atty dóńgelek ústelde QR Prezıdenti janyndaǵy Qazaqstan strategııalyq zertteýler ınstıtýtynyń bas ǵylymı qyzmetkeri Vıacheslav Dodonov málim etti.
«Meniń oıymsha, onyń baǵasynyń budan keıin aıtarlyqtaı quldyraýy oryn almaıdy. Munaı qunynyń ortasha jyldyq baǵasy 50 dollar deńgeıinde qalyptasady»,- dedi V. Dodonov.
Osy oraıda ol búginde Qazaqstanda ekonomıkanyń keri qubylystaryna qarsy turý boıynsha eki ádis qoldanylyp otyrǵandyǵyn atap ótti.
«Olar eki negizgi baǵytty qamtyp otyr. Bul turǵyda ekonomıkany yntalandyrý, ıaǵnı bular - «Nurly jol» baǵdarlamasynda belgilengen sharalar. Osy baǵytta ishki suranys pen tutynýdyń ishki shyǵystaryn yntalandyrý, onyń ishinde memlekettik qoldaý esebinen shaǵyn jáne orta bıznestiń ınfraqurylymdyq jobalaryn, qarjylyq sektordy qoldaý qarastyrylǵan. Buǵan qosa bıýdjettik qarjyny únemdeý qajettiligi qamtylyp otyr. Atap aıtqanda, osy qos tetik iske asyrylady», - dedi sarapshy.
Aıta keteıik, dóńgelek ústelge Qazaqstan strategııalyq zertteýler ınstıtýtynyń, Tuńǵysh Prezıdent qory janyndaǵy Álemdik ekonomıka men saıasat ınstıtýtynyń aldyńǵy qatarly qazaqstandyq sarapshylary, Eýrazııalyq ıntegratsııa ınstıtýtynyń, sondaı-aq TMD elderi men AQSh-tyń sarapshalary qatysýda.
