Munaı baǵasynyń 7 paıyzǵa tómendeýi teńgege qalaı áser etti
Munaı baǵasy kúrt tómendep, bir barreli 63 dollarǵa deıin túsken. Bul jaǵdaıdyń teńge baǵamynyń dınamıkasyna qalaı áser etkenin Ulttyq banktiń monetarlyq operatsııalar departamentiniń dırektory Nurjan Tursynhanov túsindirdi, dep habarlaıdy QazAqparat.
«18 naýryzdaǵy saýda sessııanyń qorytyndylary boıynsha munaı baǵasy 7 paıyzǵa, bir barreli úshin 68 dollardan 63,3 dollarǵa deıin tómendegen. Munaı baǵasy ótken jyldyń maýsym aıynan beri tómendep keldi. Buǵan munaıǵa degen suranystyń baıaý qalpyna kelý qaýpi men Eýropa jáne damýshy elderde vaktsınalaýdyń áli de tómen qarqyny sııaqty birqatar faktorlar sebep boldy. Munaıǵa degen suranystyń baıaý qalpyna kelý qaýpi ınvestorlardyń azııalyq munaı naryǵynda satyp alýlardyń tómendeýine qatysty alańdaýshylyǵymen baılanysty bolyp otyr. Qytaıda munaıdy satyp alýdyń báseńdeýin qytaılyq munaı óńdeýshi kásiporyndardyń ırandyq munaı eksportyna qatysty sanktsııalaryna qaramastan, ony satyp alýymen baılanystyryp otyr», - dep atap ótti N.Tursynhanov.
Onyń aıtýynsha, Eýropada, ásirese Italııa jáne Frantsııada Covid-19 oqıǵalarynyń kóptep tirkelýi jáne eýropalyq elderde AstraZeneca vaktsınasyn qoldanýdy toqtatý sebebimen vaktsınalaýdyń báseńdeýi jańa karantın shekteýleriniń engizilýine, taǵy bir týrıstik maýsymnyń ótkizilmeýine qaýip tóndirip otyr.
