Munaı baǵasy, ınflıatsııa, eksport – ekonomıka mınıstri 2027 jylǵa deıingi boljamyn aıtty

ASTANA. QazAqparat – Parlament Májilisiniń jalpy otyrysynda «2023 - 2025 jyldarǵa arnalǵan respýblıkalyq bıýdjet týraly» Qazaqstan Respýblıkasy Zańynyń jobasy qaralyp jatyr, dep habarlaıdy QazAqparat tilshisi.

QR Ulttyq ekonomıka mınıstri Álibek Qýantyrov 2023 - 2027 jyldarǵa arnalǵan áleýmettik-ekonomıkalyq damý boljamy týraly aıtyp berdi.

«Birinshiden, boljam 2021 jyly ekonomıkanyń ósýi boıynsha qorytyndy derekterin, halyqaralyq qarjy uıymdarynyń álemdik ekonomıkanyń ósýi men eksporttyq taýarlar baǵasy boıynsha boljamdaryn eskere otyryp qalyptastyryldy. Bul rette, halyqaralyq qarjy uıymdarynyń konsensýs-boljamyna sáıkes, 2022 jyly munaıdyń álemdik baǵasy barreline 104,2 AQSh dollary deńgeıinde kútiledi, 2023 jyly álemdik ekonomıkanyń ósýi 3%-dy bolady», - dedi Ulttyq jkonomıka mınıstri Májilistiń jalpy otyrysynda.

Onyń aıtýynsha, boljam men bıýdjettik parametrlerdi qalyptastyrýdyń negizi retinde bazalyq stsenarıı alyndy. Osy stsenarıı boıynsha munaıdyń ortasha baǵasy barreline 85$ dep kórsetilgen. Jalpy ishki ónimniń ortasha jyldyq naqty ósýi 3,9% bolady.

«Inflıatsııa 2023 jyly 7,5-9,5% deńgeıinde, 2024 jyly 4-5%, 2025 - 2027 jyldary 3-4% deńgeıinde belgilendi. Jalpy ishki ónimniń naqty ósýi 2023 jylǵy 4,0%-dan 2027 jyly 4,2%-ǵa deıin jedeldeıdi dep kútiledi. Nomınaldy jalpy ishki ónim 120,7 trln teńgeden 176,6 trln teńgege deıin ósedi», - dedi Á. Qýantyrov.

Sonymen birge, munaı óndirý 2023 jyly 92,6 mln tonna bolyp, 2027 jyly 99,9 mln tonnaǵa deıin ulǵaıady. Ulttyq Banktiń boljamy boıynsha eksport 80,9 mlrd AQSh dollarynan 84,6 mlrd AQSh dollaryna deıin, ımport 45,7 mlrd AQSh dollarynan 53,5 mlrd AQSh dollaryna deıin ósedi.